Янгийўлда икки талаба 56 ёшли такси ҳайдовчисини пичоқлади

Тошкент вилоятининг Янгийўл туманида 2 нафар йигит 56 ёшли такси ҳайдовчисини пичоқлади. Бу ҳақда Бош прокуратура матбуот котиби Ҳаёт Шамсутдинов QALAMPIR.UZ'га маълум қилди.

Жорий йилнинг 27 апрель куни соат 23:30 ларда фуқаролар – М.З. ва М.Д. қасддан одам ўлдириш ва ўзганинг мулкини эгаллаш мақсадида ошхона пичоғи билан қуролланиб, Тошкент шаҳридаги “Олмазор” метро бекати ёнига келиб, такси буюртма берган.

Улар чақирувга асосан келган такси ҳайдовчиси А.Ч.нинг бошқарувида бўлган Gentra автомобилига ўтириб, олдиндан тузилган режага мувофиқ уни Тошкент-Термиз автомобиль йўли орқали Янгийўл туманига йўналтирган. Улар 28 апрель куни тахминан соат 01:00 ларда туманнинг “Чаманзор” МФЙ ҳудудига етиб келиб, “Янгийўл шароб савдо” МЧЖ фойдаланувидаги токзор ичига киргач, автомашинани тўхтатишган.

Атрофда ҳеч ким йўқлигидан фойдаланиб, орқа ўриндиқда ўтирган М.Д. олдиндан тайёрлаб қўйилган ва ёнида бўлган ошхона пичоғи билан А.Ч.нинг бўйин соҳасига бир маротаба уриб, бўйнини қўллари билан бўғган. М.З. эса жабрланувчининг қўлларини ушлаб турган.

Шу вақтда туман ИИБнинг тунги навбатчилик гуруҳи аъзолари томонидан ҳолат аниқланиб, 2 йигит қўлга олингани сабабли бошланган жиноят охирига етмаган.

Янгийўл туман тиббиёт бирлашмасининг маълумотномасига кўра, фуқаро А.Ч.нинг бўйин ўнг томон соҳасида санчилган жароҳатлар аниқланган. Ҳодиса жойидан бир дона ошхона пичоғи ва қонга ўхшаш доғлар ашёвий далил сифатида процессуал тартибда ҳужжатлаштириб олинган.

Мазкур ҳолат юзасидан туман прокуратураси томонидан Жиноят кодексининг 25, 97-моддаси 2-қисми “и, п” бандлари ва 164-моддаси 3-қисми “б” банди билан жиноят иши қўзғатилди. Жиноят иши бўйича М.З. ва М.Д. Жиноят процессуал кодексининг 227-моддаси тартибида ушланган. Кеча, 29 апрель куни уларга нисбатан қамоққа олиш тарзидаги эҳтиёт чораси қўлланилган.

Ҳозирда жиноят иши юзасидан туман прокуратураси томонидан дастлабки тергов ҳаракатлари олиб борилмоқда.

Маълумот учун, М.З. 2004 йилда туғилган бўлиб, Тошкент ахборот ва технологиялар университети талабаси. Унинг шериги М.Д. эса 2006 йилда туғилган бўлиб, Тошкент Давлат иқтисодиёт университетида ўқийди.