Яна авиаҳалокат. АҚШ осмонида 2 самолёт тўқнашди

north_east

“Кўршапалакдек осилиб турардик”. Канададаги йирик авиаҳалокат тафсилотлари (фоторепортаж)

Кеча, 19 февраль куни АҚШнинг Аризона штати жанубида иккита кичик самолётнинг тўқнашуви оқибатида икки киши ҳалок бўлди. Бу ҳақда “Америка овози” хабар берди.

Миллий транспорт хавфсизлиги кенгаши маълумотларига кўра, ҳар бир самолёт бортида икки киши бўлган. Тўқнашув Туксон шаҳри яқинидаги Марана минтақавий аэропорти яқинида содир бўлган.

Тўқнашувдан сўнг Cessna 172 хавфсиз қўнишга муваффақ бўлди,  Lancair 360 MK II эса учиш-қўниш йўлаги яқинида ерга қулаб тушди ва ёниб кетди.

Ҳалок бўлганларнинг икки нафари самолётлардан бирида бўлган, бироқ Марана полицияси гап қайси бири ҳақида кетаётганига аниқлик киритмаган.

Шу билан бирга, Cessna'га тегишли бўлган AeroGuard парвоз мактаби унинг икки учувчиси жабрланмаганини маълум қилди.

“Самолётларнинг ҳеч бири Марана аэропортида жойлашган эмас. Ўт ўчирувчилар тезда ёнғинни ўчиришди”, деб таъкидлади шаҳар маъмурияти.

AeroGuard матбуот котиби Метт Паничас воқеа тафсилотларини изоҳлашдан бош тортди, бироқ компания тергов билан ҳамкорлик қилаётганини айтди.

“Ушбу фожиада икки кишининг ҳалок бўлганидан чуқур қайғудамиз. Биз уларнинг оилалари ва дўстларига ҳамдардлик билдирамиз”, дейди у.

Маълумот учун, Марана аэропорти иккита кесишган учиш-қўниш йўлагига эга, аммо бошқарув минорасисиз ишлайди. Кўп миллион долларлик лойиҳа доирасида режалаштирилган янги минора қурилиши COVID-19 пандемияси туфайли кечиктирилган. Қўшма Штатлардаги аксарият аэропортларда бошқарув миноралари ҳам йўқ. Бундай ҳудудларда учувчилар парвоз ва қўнишларни мувофиқлаштириш учун махсус радиоканалдан фойдаланади.

Тўқнашув ўтган ой давомида Шимолий Америкада содир бўлган бир қатор йирик авиация ҳодисалари фонида юз берди. Торонтога қўнаётганда ағдарилган Delta самолёти, Аляскада йўловчи самолётининг қулаши ва январь охирида Вашингтондаги фожиа, American Airlines йўловчи самолёти ҳарбий вертолёт билан тўқнашиб кетиши оқибатида 67 киши ҳалок бўлганлар шулар жумласидандир.