“Кўршапалакдек осилиб турардик”. Канададаги йирик авиаҳалокат тафсилотлари (фоторепортаж)

Кеча, 17 февраль куни маҳаллий вақт билан тушдан кейин Канаданинг Торонто Пирсон аэропортида кучли шамол эсаётган пайтда ҳаво ҳаракати бошқарувчилари қўнишга рухсат берган тор фюзеляжли самолёт 80 нафар йўловчи ва экипаж аъзолари билан учиш-қўниш йўлагига яқинлашди. Аммо бир неча сония ичида самолёт ҳалокатга учраб, ёнғин чиқа бошлади, қутқарув хизматлари эса тезда олов билан курашиш учун ҳаракатга тушди. Бу ҳақда CNN хабар берди.

АҚШнинг Миннеаполис шаҳридан ҳавога кўтарилган Delta авиакомпанияси рейси бортидаги барча йўловчилар тирик қолган, аммо самолётнинг қандай қилиб ағдарилиб кетгани ҳақида ҳозирча расмий маълумот йўқ. Самолёт ғилдираклари тепага қараган ҳолда, ёниб кетган корпуси ва қанот учларининг шикастланган ҳолати билан учиш-қўниш йўлагида қолган. Ичкарида эса камар билан боғланган йўловчилар ўз ўринларидан осилиб қолган.

Delta авиакомпанияси баёнотига кўра, ҳалок бўлганлар йўқ. Авиакомпания ва Торонто аэропортининг ёнғин хизмати бошлиғи Тодд Аиткеннинг маълум қилишича, ҳодисада 18 киши жароҳатланган ва шифохоналарга юборилган.

Торонто шаҳридаги Sick Kids болалар шифохонаси маълумотига кўра, жабрланганлар орасида битта бола бор, аммо унинг аҳволи яхши.

Пил ҳудудидаги тез тиббий ёрдам хизмати эса 15 нафар йўловчи жароҳатланганини билдирган. 

“Биз ҳалок бўлганлар йўқлиги ва жароҳатлар нисбатан енгиллиги учун жуда миннатдормиз”, дейди Торонто аэропорт бошқармаси бош директори Дебора Флинт.

Канаданинг энг гавжум аэропорти бўлган Торонто Пирсон аэропортида ушбу даҳшатли ҳодиса қисқа муддатга парвозларнинг тўхтаб қолишига сабаб бўлди. Бу ҳодиса АҚШда парвоз хавфсизлигига оид кучайган хавотирлар фонида юз бераётган тўртинчи йирик авиаҳалокат.

Уч ҳафта олдин Вашингтонда АҚШ армиясига тегишли Black Hawk вертолёти билан ҳаво тўқнашуви содир бўлган ва оқибатда 67 киши ҳалок бўлганди.

Торонто Пирсон аэропортида бўлган ушбу ҳодисада йўловчилар ағдарилиб кетган CRJ900 самолётидан қутқарувчилар ёрдами билан чиққан.

Delta рейсини Endeavor Air – Delta авиакомпаниясига тегишли минтақавий ҳаво линияси бошқарган. Эндиликда АҚШ ва Канада терговчилари самолётнинг нима сабабдан ағдарилиб кетганини аниқлаш учун биргаликда иш олиб боради.

Самолёт аэропортга яқинлашаётган пайтда, ҳаво ҳаракати назоратчилари учувчиларга соатига 61 км/соат тезликда шамол эсаётганини маълум қилган.

“Қўниш траекториясида кичик чайқалиш бўлиши мумкин. Олдингизда бошқа самолёт бор”, дейди ҳаво ҳаракати диспечери.

Орадан икки дақиқа ўтар-ўтмас самолёт ағдарилган. Портлаш содир бўлган, учиш-қўниш йўлаги бўйлаб олов ва тутун кўтарилган. Гувоҳлар ва йўловчилар, жумладан Жон Нельсон ва Питер Коуков воқеани тасвирлаб берган.

 “Биз якунида ағдарилиб ётардик. Ҳаммамиз шундай аҳволда эдик. Тезроқ чиқиш учун ҳаракат қилдик”, дейди Нельсон.

Нельсон самолётдан чиққач, яна бир портлаш содир бўлгани, аммо ёнғин ўчирувчилар тезда оловга қарши курашганини қўшимча қилган.

Шу вақтда воқеа яқинида бўлган тиббий вертолёт ёрдам таклиф қилган. Учувчилар самолёт ёнида одамлар ҳаракатланаётганини кўриб, ҳаво ҳаракати диспечерларидан ҳолат бўйича қўшимча маълумот сўраган.

Ёнғин ўчириш машиналари самолёт томон шошилган ва оқ кўпикли суюқлик пуркаб ёнғинни ўчиришга ҳаракат қилган. Видеотасвирларда самолёт двигатель атрофида эриб кетган корпуси ва ён томонларида қора доғлар борлиги кўринган.

“Биз кўршапалаклардек осилиб турардик. Мен камарни ечиб, полга тушдим, лекин баъзи одамлар ёрдамга муҳтож эди”, деди Коуков.

Нельсон эса ўз жойидан тушиш учун шериги билан камарини ечиб, пастга йиқилган.

“Ҳамма шошилиб чиқишга ҳаракат қилаётганди”, дейди у.

Ҳалокат сабабли Торонто Пирсон халқаро аэропорти барча бешта учиш-қўниш йўлагини вақтинча ёпган. Бу эса мамлакатнинг энг гавжум аэропортида кечикишларга сабаб бўлган. 17 февраль соат 16:15 га келиб 200 дан ортиқ рейс бекор қилинган.

Маҳаллий вақт билан соат 17:00 да аэропорт учта учиш-қўниш йўлагини қайта очган, аммо ҳалокат содир бўлган иккита йўлак тергов давомида бир неча кун ёпиқ бўлиши кутилмоқда.