Аляскада ғойиб бўлган самолёт топилди

Кеча, 7 февраль куни АҚШнинг Аляска штатида Bering Air авиакомпаниясининг йўқолган самолёти Ном шаҳрига учаётганда ҳалокатга учраган. Самолёт бортидаги 10 кишининг барчаси ҳалок бўлган. Бу ҳақда маҳаллий ҳокимиятга таяниб, “Associated Press” хабар берди.

Аляска Қирғоқ қўмитаси лейтенанти Бенжамин Макинтайр-Коблга кўра, самолёт билан кутилмаганда баландлик ва тезликни йўқотишга олиб келган ҳодиса юз берган. Самолётдан авария сигнали олинмаган.

Қайд этилишича, мазкур рейс одатий ишга бориш рейси бўлиб, барча йўловчилар катта ёшдагилар бўлган. Аляскада ландшафт ва чекланган инфратузилма туфайли самолётлар асосий транспорт тури ҳисобланади. Бу ҳалокат сўнгги 25 йил ичида штатдаги энг ҳалокатли воқеалардан бири сифатида қайд этилган.

Эслатиб ўтамиз, аввалроқ Cessna 208 Caravan самолётининг радарлардан йўқолиб қолгани ҳақида хабар берилганди. Самолёт билан алоқа тахминан учишдан 40 дақиқа ўтиб узилган, шу пайт у Нортон Соунд кўрфазининг устида учиб бораётган бўлган.