Аляскада бортида 10 киши бўлган самолёт радарлардан йўқолиб қолди

АҚШнинг Аляска штатидаги Уналаклит шаҳридан Ном шаҳрига йўл олган Bering Air йўловчи самолёти бортида 10 киши билан радарлардан йўқолиб қолди. Бу ҳақда Аляска Жамоат хавфсизлиги департаментига таяниб, “Reuters” хабар берди.

Маълум қилинишича, кичик турбовинтли Cessna Caravan самолётида тўққиз нафар йўловчи ва бир учувчи бўлган. Ҳозирда қидирув экипажлари самолётнинг сўнгги маълум координаталарини аниқлаш устида иш олиб бормоқда.

АҚШ Касбий хавфсизлик ва соғлиқни сақлаш миллий институти (NIOSH) маълумотларига кўра, Аляскада бошқа АҚШ штатларига қараганда авиация такси ва йўловчи самолётлари билан боғлиқ ҳалокатлар сони сезиларли даражада юқори. Бунга асосий сабаб Аляскада тоғли ҳудудлар ва мураккаб об-ҳаво шароити мавжуд. Ҳудуддаги кўплаб қишлоқлар йўллар орқали боғланмаган, шунинг учун кичик самолётлар асосий транспорт воситаси ҳисобланади.

“FlightRadar24” портали маълумотларига кўра, Bering Air – Аляскада жойлашган минтақавий авиакомпания бўлиб, тахминан 39 та самолёт ва вертолётга эга.

Самолётнинг сўнгги жойлашуви денгиз устида қайд этилган бўлиб, маҳаллий вақт билан 14:38 да, Уналаклитдан ҳавога кўтарилганидан 38 дақиқа ўтиб кузатилган. Ушбу йўналишда парвоз одатда бир соатдан кам вақт давом этади. Bering Air компанияси эса ҳозирча вазиятга изоҳ бермаган.

Эслатиб ўтамиз, аввалроқ Американинг Сиэтл-Такома аэропортида Япониянинг Japan Airlines компаниясига тегишли бўлган йўловчи самолёти АҚШнинг Delta Air Lines авиакомпаниясига қарашли самолёт билан тўқнашган эди. Тўққиз соат давом этган парвоздан сўнг Токиодан учган самолёт бортида 172 йўловчи ва 13 экипаж аъзоси бўлган. Delta Air Lines самолётида эса 142 йўловчи бўлиб, у Мексиканинг Пуэрто-Вальярта шаҳрига учиши керак бўлган. Йўловчилар эса бошқа самолётга кўчирилган.