АҚШда 2 та йўловчи самолёти тўқнашди

Кеча, 5 февраль куни Американинг Сиэтл-Такома аэропортида Япониянинг Japan Airlines компаниясига тегишли бўлган йўловчи самолёти АҚШнинг Delta Air Lines авиакомпаниясига қарашли самолёт билан тўқнашди. Бу ҳақда “Reuters” хабар берди.

Вашингтон штатида, Тинч океанинг шимоли-ғарбий қисмида жойлашган энг йирик халқаро аэропортлардан бири бўлган Сиэтл-Такомада Delta Air Lines самолёти техник кўрикдан ўтиш учун навбатда турганида, Japan Airlines самолёти учиш йўлакчасидан келаётган эди. Унинг қаноти Америка самолётининг думига тўқнашган ва зарар кўрган.

Билдирилишича, воқеа самолётлар ҳаво ҳаракатини бошқариш назорати остида бўлмаган ҳудудда содир бўлгани учун бошқа самолётларнинг учишига халақит бермайди. Шундай бўлса-да, баъзи рейслар кечиктирилиши мумкин.

Қайд этилишича, тўққиз соат давом этган парвоздан сўнг Токиодан учган самолёт бортида 172 йўловчи ва 13 экипаж аъзоси бўлган. Delta Air Lines самолётида эса 142 йўловчи бўлиб, у Мексиканинг Пуэрто-Вальярта шаҳрига учиши керак эди. Ҳозирда жабрланганлар ҳақида маълумот берилмаган. Йўловчилар эса бошқа самолётга кўчирилган.

Эслатиб ўтамиз, 30 январга ўтар кечаси Вашингтондаги Рональд Рейган аэропортида American Airlines авиакомпаниясига тегишли Bombardier CRJ700 минтақавий йўловчи самолёти Sikorsky H-60 (Black Hawk) ҳарбий вертолёти билан қўниш чоғида тўқнашганди. Бортдаги йўловчилар ва экипажнинг ҳаммаси ҳалок бўлган ва уларнинг жасадлари Потомак дарёсидан чиқариб олинган.

Сара Комилжонова