Vashingtondagi aviahalokat: 67 kishining jasadi topildi

Kecha, 4 fevral kuni qutqaruvchilar AQSHning Vashington shahrida halokatga uchragan Bombardier CRJ700 yo‘lovchi samolyoti va u bilan to‘qnashgan vertolyotda bo‘lgan umumiy 67 nafar qurbonning jasadini Potomak daryosidan chiqarib oldi. Bu haqda Vashington yong‘in va tez tibbiy yordam xizmati bo‘limi X sahifasida xabar berdi.

“Qo‘shma qo‘mondonlik havo kemalarining to‘qnashuvi oqibatida qurbon bo‘lgan 67 kishi chiqarilganini tasdiqlaydi”, deyiladi bayonotda.

Shuningdek, 66 kishining shaxsi aniqlangani ma’lum qilindi.

Ma’lumot uchun, oldinroq “The New York Times” gazetasi Federal fuqaro aviatsiyasi boshqarmasining dastlabki hisobotiga tayanib, Vashington Ronald Reygan aeroportida samolyot va vertolyotning to‘qnashuvi vaqtida dispetcherlik smenasi to‘liq bo‘lmaganini, bitta mutaxassis bir vaqtning o‘zida bir nechta vazifani bajarganini, jumladan, vertolyotlar harakatini muvofiqlashtirish va samolyotlarning qo‘nishini nazorat qilganini yozdi. Keyinchalik NBC telekanali, aeroportdagi havo harakatini boshqarish xizmati rahbari dispetcherlardan biriga smenadan oldinroq ketishga ruxsat berganini xabar qildi. Havo kemalari halokatiga shu omil asosiy sabab bo‘lishi mumkin.

Eslatib o‘tamiz, 30 yanvarga o‘tar kechasi Vashingtondagi Ronald Reygan aeroportida American Airlines aviakompaniyasiga tegishli Bombardier CRJ700 mintaqaviy yo‘lovchi samolyoti harbiy Sikorsky H-60 ( Black Hawk ) vertolyoti bilan qo‘nish chog‘ida to‘qnashgandi. Layner bortida 60 nafar yo‘lovchi va to‘rt ekipaj a’zosi bo‘lgan, vertolyotda esa uch kishi bor edi.