Ўзгидромет Косонсойга сел келишининг сабабини тушунтирди

Жамият 6007
image

Кеча, 13 июль куни Наманган вилоятининг Косонсой туманида сел кузатилиб, 8 кишининг ўлимига сабаб бўлгани хабар қилинганди. Ўзбекистон Гидрометеорология хизмати маркази мазкур ҳодисага нима сабаб бўлганини маълум қилди.

Қайд этилишича, 13 июль куни Қирғизистон Республикасининг шимоли-ғарбий қисми ва Қозоғистон жанубидан атмосфера совуқ фронти ўтди. Куннинг иккинчи ярмида фронт ўтиши ортидан, Фарғона водийси тоғ ҳавзаларида кучли ёмғирли тўп-тўп булутлар ривожланди.

Қирғизистон Республикаси Жалолобод вилояти Оқсув ва Олабуқа туманларида маҳаллий вақт соат 12:35 ва 13:25 оралиғида кучли жала ёмғилар ёғиб ўтди. Кучли жала ёмғирлар Жалолобод вилояти Оқсув тумани ва Наманган вилояти Косонсой туманидан оқиб ўтувчи Косонсой сойида сел оқимини ҳосил қилди.

Наманган вилояти Косонсой тумани айрим ҳудудларида қисқа муддатли жала ёмғирлари ва дўл ҳодисаси кузатилди. Ўртача ҳисобда дўл диаметри 1 см ни ташкил этди.

“Косонсой тумани тоғ олди ҳудуд ҳисобланиб, георафик жойлашганлигига кўра, сел-тошқинлари ҳосил бўлишига мойил ҳудуд саналади. 2021 йил 13 июль куни қўшни Қирғизистон Республикаси ҳудудларида кузатилган кучли жала ёмғирлар ҳисобига шаклланган Косонсой сойидаги сел ҳодисалари олдинлари туманнинг бошқа сойларида ҳам тез-тез такрорланган”, дейилади Ўзгидромет хабарида.

2021 йил 13 июль куни Косонсой сойидан максимал 60 м куб/с миқдордаги сел-сув тошқиини ўтган. Бу Косонсой сойи учун максимал миқдор эмас. Косонсой сойида сел ҳодисалари 1878 йилдан бошлаб рўйхатга олиб келинади. Сойда сел ҳодисалари асосан, апрель-июль ойларида ҳосил бўлади. Косонсой сойида тез-тез сел ҳодисалари кузатилган бўлиб, 1964 йил 27-28 июлда 278 м куб/с, 1988 йил 1 майда 200 м куб/с, 1992 йил 25 майда 250 м куб/с миқдорида сел келган.

Ўзбекистон Республикаси Гидрометеорология хизмати маркази маҳаллий аҳолидан 2021 йил 14-17 июл кунлари Қирғиз Республикаси билан чегарадош бўлган ҳудудлардаги дам олиш масканларига бормасликни сўраган.

Суннатилла Абдуллаев
Мақолага баҳо беринг
Баҳолаганлар: 187
Рейтинг: 2.9
t
×