БАА-Ўзбекистон ўйини олдидан футбол мухлислари огоҳлантирилди (видео)

Тошкент шаҳар Ички ишлар бош бошқармаси Ўзбекистон миллий терма жамоасининг БААга қарши ўйини олдидан туристик компаниялар борасида огоҳлантириш билан чиқди. Бу ҳақда бош бошқарма матбуот хизмати хабар берди. 

Манбага кўра, Ўзбекистон миллий терма жамоасининг 5 июнь санасида БААга қарши ўйини олдидан туристик компаниялар томонидан мухлисларга ўйин чиптаси кафолатланган тур пакетлар таклиф этилаётгани кузатилмоқда. Бироқ ҳозирча БААда бўлиб ўтадиган баҳснинг расмий чипталари сотувга чиқарилмаган. Шу боис ИИББ футбол мухлисларини ҳушёрликка чақирди.

“Чипта кафолатланган деган ваъдаларга ишониб, тасдиқланмаган саёҳат пакетларини харид қилиш молиявий зарар ёки фирибгарликка учраш хавфини оширади”, дейилади хабарда.

Маълумот ўрнида, 2026 йил АҚШ, Мексика ва Канада майдонларида бўлиб ўтадиган футбол бўйича Жаҳон чемпионати саралаши доирасида Ўзбекистон миллий терма жамоаси 5 июнь куни Бирлашган Араб Амирликларига, 10 июнь куни  эса Тошкентда Қатарга қарши майдонга тушади.

Темур Кападзе қўл остидаги жамоа А гуруҳида 17 очко билан 2-ўринни эгаллаб турибди. Агар жамоа БААга қарши ўйинда бир очко қўлга киритса, муддатидан аввал мундиал масаласини ҳал қилади.