UEFA “болғачилар”ни жазолади

UEFA ташкилоти Лондоннинг “Вест Хэм” клуби Бельгиянинг “Генк” жамоасига қарши кечган Европа лигаси гуруҳ босқичи 4-тур учрашувида мухлислари тартибсизлик уюштиргани учун жазоланиши ҳақида баёнот берди.
 
Девид Мойес шогирдлари жорий йилнинг 4 ноябрь куни бўлиб ўтган учрашувдан сўнг, 34,5 минг евро миқдорида жаримага тортилди, шунингдек, Европа лигасининг навбатдаги ўйинига “болғачилар” мухлислари бора олмайди.

Клуб зудлик билан UEFA’дан аниқлик киритишни талаб қилмоқда. Чунки “Рапид”га қарши баҳс учун чипталар сотиб бўлинган.

“Биз ушбу санкциялардан ҳайратдамиз. Клуб UEFA’дан ушбу санкциялар бўйича тўлиқ ёзма тушунтириш беришни сўради ва кейинги кечикиш мухлисларга яна таъсир қилиши мумкинлигини ҳисобга олиб, уни тезлаштириш қўшимча қилинди. Ва ниҳоят, баҳс учун сотилган 1700 та чиптани сотиб олган мухлисларни ишонтириб айтмоқчимизки, агар ташкиот санкциялар тўғрисида қарор қабул қилса, ва у Австрияда бўлиб ўтадиган ўйинга даҳлдор бўлса, ҳаражатлар тўлиқлигича тўлаб берилади”, дейилади клубнинг расмий баёнотда.

Маълумот учун, “Рапид” – “Вест Хэм” учрашуви жорий йилнинг 25 ноябрь куни Вена шаҳридаги “Аллианц” стадионида бўлиб ўтади.