Туркияда намойишчилар тарихий қабрларни бузиб ташлади (видео)

Туркиянинг Сарачхона туманидаги намойишлар чоғида иштирокчилар Шаҳзодабоши масжиди ва қабристонини вайрон қилди. Бу ҳақда GDH хабар берди. 

Маълум қилинишича, намойишчилар қабристондаги тарихий қабрларни бузиб ташлашган.

Ижтимоий тармоқларда тарқалган видеоларга кўра, масжид боғида бир гуруҳ оломон спиртли ичимлик ичиб, масжид деворларини булғашган.

Намойишлар чоғида 500 йил муқаддам Сулаймон Султон томонидан қурилган тарихий Шаҳзодабоши масжидининг деворларига пуркагичли бўёқ билан шиорлар ёзилган.

Намойишчиларнинг ушбу ҳаракатлари кўплаб Туркия расмийлари томонидан қораланди ва бу ахлоқ қоидаларига тўғри келмаслиги айтилди. Масалан, давлат раҳбари Ражаб Тойиб Эрдўған намойишчилар ва мухолифатнинг демократиядан тушунчаси йўқлигини айтган. Шу билан бирга, у намойишчилар ўз чегарасидан чиқмаслигини ҳам эслатган.

“Озодлик деганда кўчаларни, тарихий масжидларимизнинг ҳовлиларини, аждодларимизнинг қабр тошларини ёқиб юборишни, зиёратгоҳларимизда спиртли ичимликлар ичишни назарда тутаётган бўлсалар, биз ҳеч қандай шароитда у ерда бўлмаймиз ва бўла олмаймиз. Буни ҳуқуқ ва эркинликлар доирасида кўриб чиқа олмаймиз, шу пайтгача ҳеч кимнинг бизга демократиядан сабоқ беришига, инсон ҳуқуқлари ва эркинликлари каби тушунчалар орқали халқ иродасини пистирма қилишга рухсат берганимиз йўқ, бундан кейин ҳам буни қилмаймиз”, дея огоҳлантирган Эрдўған.

Экрем Имомўғлининг ҳибсга олиниши

19 март куни тонгда Истанбул ҳокими ва Туркия Президенти Ражаб Тойиб Эрдўғаннинг асосий сиёсий рақиби Экрем Имомўғли ҳамда унинг 106 тарафдори ҳибсга олинганди. Имомўғли ва 99 гумонланувчига нисбатан жиноий ташкилот етакчиси бўлиш, жиноий ташкилотга аъзолик, товламачилик, порахўрлик, малакали фирибгарлик, шахсий маълумотларни қонунга хилоф равишда қўлга киритиш ва тендер савдоларини сохталаштиришда, Имомўғли ва яна 6 киши эса қуролли террор ташкилотига ёрдам бериш билан гумонланганди.

23 март куни суд Экрем Имомўғлини коррупция тергови доирасида ҳибсга олишга қарор қилди. Бош прокуратура Имомўғли “қуролли террор ташкилотига ёрдам берганлиги бўйича кучли гумон” борлигини, аммо уни молиявий жиноятлар учун ҳибсга олиш қарори аллақачон чиқарилгани сабабли, унинг яна ҳибсга олиниши “ҳозирги босқичда зарур эмас”лигини билдирди.

Ўша куни Экрем Имомўғли президентликка номзод қилиб кўрсатилиши учун 14,85 миллиондан ортиқ киши овоз берди. 

Мазкур воқеалар фонида Туркиянинг йирик шаҳарларида намойишлар авж олди. Намойишларда 1 мингдан ортиқ одам ҳисга олинди. Улар орасида Президент Эрдўған ва унинг марҳум онасини ҳақорат қилганлар ҳам бор. Эрдўғаннинг ўзи намойишларда қатнашганларни бундай ҳаракатларининг оқибатларидан огоҳлантирди.