Туркияда эркак дастлаб хотинини, кейин ўзини отиб ўлдирди (видео)

Туркиянинг Алачам туманида эркак дастлаб турмуш ўртоғини, сўнгра ўзини отиб ўлдирди. Бу ҳақда “Gazete Gerçek” хабар берди.

Маълум бўлишича, 40 ёшли Женгиз Алтинел исмли эркак яқинда ажрашиши керак бўлган 32 ёшли хотини Пинар Алтинел билан кўришиб, у билан гаплашиб олмоқчи бўлган. Гаплашиб олиш учун ёқилғи қуйиш шохобчасининг ресторан қисмига борган. Эр-хотин ўртасидаги жанжал тезда қуролли ҳужумга айланган. Женгиз Алтинел ўзи билан олиб борган қурол билан рафиқасини отиб ўлдирган, кейин эса ўша қурол билан ўз жонига қасд қилган.

Ҳодисага гувоҳ бўлган атрофдагиларнинг хабар бериши биланоқ воқеа жойига соғлиқни сақлаш ва полиция гуруҳлари етиб борган. Тергов натижасида эр-хотин воқеа жойида вафот этгани аниқланган.

Эр-хотиннинг фарзандлари бўлмаган. Ҳозирда воқеанинг асл сабаблари ўрганилмоқда.

Эслатиб ўтамиз, аввалроқ Туркиянинг Истанбул шаҳри Картал туманида 28 ёшли ўзбекистонлик аёл молиявий қийинчиликлар туфайли юзага келган жанжал чоғида эрини пичоқ билан яралаб, уни ўлдирганликда гумонланиб, ушлангани ҳақида хабар берилганди. Кейинчалик марҳум эркак аёлни бўғаётган пайтда орқа томондан пичоқ билан жароҳатлангани ва бу уни бошқа шахс томонидан пичоқланган бўлиши эҳтимолини истисно этмаслиги айтилди.