Цукерберг ер остида бункер қурдиряпти. Миллиардер ядровий урушга тайёрланяптими?

Meta асосчиси Марк Цукерберг Гавайида 270 млн долларлик улкан ер ости бункерини қурдирмоқда. Бу ҳақда “Wired” нашри хабар берди.

Маълумотларга кўра, Гавайидаги Кауай оролининг шимоли-шарқида, Капаа ва Ханалей сайёҳлик марказлари ўртасидаги сокин фермада улкан, махфий қурилиш лойиҳаси олиб борилмоқда. Унинг ер майдони қарийб 5 минг квадрат метр бўлиб, Цукерберг бу ерни 2014 йилнинг августидан бошлаб, қатор битимлар асосида сотиб олган. 

Мажмуа электрон бошқарув тизими, овоз ўтказмайдиган деворлар билан жиҳозланади. У алоҳида электр тармоғи ва озиқ-овқат таъминотига эга бўлиши мўлжалланяпти. Шунингдек, ушбу шаҳар қочиш учун люк ва ракета портлашларидан ҳимояловчи эшик билан жиҳозланади. Бункер туннел билан боғланган иккита бўлимдан иборат. Билдирилишича, уларнинг бирида Цукерберг ва унинг оиласи, иккинчисида эса бинога ташриф буюрувчилар жойлашади.

Гувоҳларнинг айтишича, ушбу ер ости бункерининг қурилиши қатъий махфийлик билан амалга оширилмоқда. Жамоалардаги ишчиларга бир-бири билан мулоқот қилиш тақиқланган. Барча қурувчилар маълумотларни ошкор этмаслик тўғрисидаги шартномага қўл қўйган. 

Шартнома шартларига кўра, ишчиларнинг ҳатто қурилиш жараёнини суръатга олиши ҳам мумкин эмас.  Хусусан, компаниянинг собиқ ишчиси Snapchat'да лойиҳа суратини баҳам кўргани учун ишдан бўшатилган.

Манбага кўра, ҳудуд 6 футли девор билан ўралган ва бу лойиҳани атрофдан тўсиб туради. Ичкарида нима бўлаётганини кўришнинг имкони йўқ. Хавфсизлик ходимлари эса кириш эшигини 24 соат қўриқлашади.

Маълумот учун, аввалроқ Цукерберг 2021 йилдан бери биринчи марта Meta компанияси акцияларини сотди. У 682 минг қимматли қоғоз учун деярли 185 млн доллар олди.

Эслатиб ўтамиз, аввалроқ америкалик миллиардер Илон Маск ғарб ва шарқ давлатлари ўртасидаги уруш ва можаролар фонида инсоният Учинчи жаҳон уруши сари кетаётганини айтганди.