Трампнинг одами яна Путиннинг олдига борди

Бугун, 25 апрель куни АҚШ Президентининг махсус вакили Стив Уиткоффнинг самолёти Россиянинг Внуково аэропортига қўнди. Бу ҳақда “Коммерсантъ” хабар берди.

Маълум қилинишича, Bombardier Global 7500 самолёти Москва вақти билан соат 9:40 атрофида Россия чегарасини кесиб ўтган.

Парвоз йўналиши АҚШнинг шарқий қирғоқлари бўйлаб амалга оширилган. У, хусусан, Канада, Гренландия ва Исландия жанубидан учиб, Норвегия, Швеция ва Латвияни кесиб ўтган.

“Axios” нашрига кўра, Россия Президенти Владимир Путин ва АҚШ етакчисининг Яқин Шарқ бўйича махсус вакили Стив Уиткофф ўртасидаги учрашув бугун, 25 апрель куни бўлиб ўтиши мумкин.

Ушбу учрашув Дональд Трампнинг инаугурация маросимидан бери тўртинчиси бўлади.

“The Spectator ” нашрининг ёзишича, Украинадаги можароларни ҳал қилиш Россия Президенти Владимир Путин ва Уиткоффнинг Москвадаги учрашуви натижаларига боғлиқ. 

Эслатиб ўтамиз, жорий йилнинг 11 апрель куни Россия Президенти Владимир Путин Санкт-Петербургдаги президент кутубхонаси биносида Америка етакчисининг махсус вакили Стив Уиткофф билан учрашув ўтказганди. Учрашув тўрт соатдан кўпроқ давом этган. Суҳбат ёпиқ эшиклар ортида бўлиб ўтган. Асосий мавзу Украинадаги вазият эди.