Трампнинг одами Кремлнинг позициясини Оқ уйга етказди

АҚШ Президентининг махсус вакили Стив Уиткофф Вашингтонда Россия Президентининг махсус вакили Кирилл Дмитриев билан учрашувидан сўнг Кремлнинг позициясини Оқ уй раҳбари Дональд Трампга етказди. Бу ҳақда “Reuters” хабар берди.

Россия Украинанинг тўртта ҳудуди устидан назоратни қўлга киритиши кераклигини талаб қилган. Бу ҳудудлар – ДХР, ЛХР, Запорожье ва Херсон вилоятлари бўлиб, Уиткофф бу шартнинг бажарилиши тинчлик битимини тезлаштиришга ёрдам беришини айтган.

АҚШ Президентининг Украина бўйича махсус вакили генерал Кит Келлог Уиткоффни қўллаб-қувватламаган. У Трампга Украина ушбу ҳудудлар билан боғлиқ баъзи шартларга рози бўлишга тайёр бўлса-да, уларни бир томонлама равишда Россияга бутунлай беришга ҳеч қачон рози бўлмаслигини айтган.

Агентликка кўра, Россия урушни тугатиш учун қўяётган шартлар бўйича Трамп маъмурияти ичидаги бўлинишлар кучаймоқда ва АҚШ Президентининг республикачи иттифоқчиларидан баъзилари Уиткофф бу масалада ҳаддан ташқари россияпараст позицияни эгаллаётганига ишонмоқда.

Кирилл Дмитриев жорий йилнинг апрель ойи бошида Вашингтонга ташриф буюрганди, бу Россия қўшинларининг Украинага кенг кўламли бостириб кириши бошланганидан бери Россиянинг бундай даражадаги расмий вакилининг АҚШга биринчи ташрифи эди. Стив Уиткофф сўнгги икки ой ичида Россияга уч марта учган.

Эслатиб ўтамиз, кеча, 11 апрель куни у Санкт-Петербургда Россия Президенти Владимир Путин билан учрашди. 11 апрель оқшомидаги йиғилишда нималар муҳокама қилингани ҳақида жамоатчиликка маълумот берилмаган.