Трампнинг дўсти Украинадаги литий конини қўлга киритди

Жорий йилнинг 8 январь куни урушдан жабр кўрган Украина ҳукумати мамлакатга сармоя жалб этиш мақсадида тендер ўтказди. Унда АҚШ Президенти Дональд Трампга яқин инвесторлар давлатга қарашли йирик литий конини қазиб олиш ҳуқуқини қўлга киритди. Бу ҳақда “The New York Times” хабар берди.  

Қайд этилишича, танловда ғолиб чиққан консорциум таркибига Трамп маъмурияти билан яқин алоқаларга эга бўлган машҳур миллиардер Рональд Лаудер ҳамда TechMet энергетика компанияси ҳам кирган.

Комиссия аъзолари консорциум асосий танлов талабларини бажаргани ва рақибларидан устун келганини таъкидлаб, қарор қабул қилиш жараёнида ҳеч қандай келишилганлик ёки “таниш-билишчилик” бўлмаганини билдирган.

Украинанинг марказий қисмида жойлашган Добра литий кони мамлакатдаги энг йирик литий захираларидан бири ҳисобланади. У электр батареялари ва бошқа юқори технологияли маҳсулотлар ишлаб чиқариш учун муҳим хомашё манбаи саналади. Лойиҳани амалга ошириш инвесторлар билан даромадни бўлишиш тўғрисидаги шартнома асосида режалаштирилган.

“Битимга кўра, Добра конидан олинадиган даромаднинг ярми қўшма жамғармага йўналтирилади. Бироқ ушбу жамғармани назорат қилувчи АҚШ агентлигининг TechMet компаниясида ҳам улуши борлиги манфаатлар тўқнашувига сабаб бўлиши мумкин”, дейилади хабарда.

Лаудер ва TechMet томонидан аниқ қанча сармоя киритиш режалаштирилгани ҳозирча маълум эмас. Маълум қилинишича, тендер шартларига кўра, камида 179 миллион долларлик инвестиция талаб этилган. Шу билан бирга, комиссия аъзоларидан бири консорциумнинг ҳақиқий сармоя мажбурияти бу миқдордан анча юқори эканини билдирган.

Эслатиб ўтамиз, аввалроқ Украина Президенти Владимир Зеленский ва АҚШ Президенти Дональд Трамп жорий йил январь ойининг охирида 800 миллиард долларлик шартнома имзолаши мумкинлиги ҳақида хабар берилган эди. Зеленский бу келишув иқтисодий тикланишни таъминлаши, иш ўринларини қайта яратиши ва ҳаётни Украинага қайтаришини айтмоқда.