Ҳеч ким Эронни ЖЧдан четлаштиришга ҳақли эмас – Эрон Трампга жавоб қайтарди

Эрон миллий терма жамоаси АҚШ Президенти Дональд Трамнинг Эрон ҳақидаги гапларидан сўнг ҳеч ким терма жамоани Жаҳон чемпионатида иштирок этишдан четлаштиришга ҳақли эмаслигини таъкидлаб, расмий баёнот берди.

“Жаҳон чемпионати тарихий ва халқаро мусобақа бўлиб, уни бошқарувчи ташкилот – Халқаро футбол федерациясидир, бирор давлат эмас. Эрон терма жамоаси ўзининг кучи ҳамда эронлик футболчиларнинг ҳал қилувчи ғалабалари эвазига ушбу йирик турнирга йўлланма олган дастлабки жамоалардан бирига айланди. Табиийки, ҳеч ким Эрон терма жамоасини Жаҳон чемпионатида иштирок этишдан четлаштиришга ҳақли эмас. Аксинча, агар мезбон давлат мусобақада қатнашаётган жамоалар хавфсизлигини таъминлай олмаса, айнан ўша мамлакат мезбонлик ҳуқуқидан маҳрум этилиши мумкин”, дейилади терма жамоанинг расмий ижтимоий тармоқ саҳифасида эълон қилинган баёнотда.

Эслатиб ўтамиз, кеча, 11 март куни Трамп ўзининг Truth Social ижтимоий тармоғидаги саҳифасида Эрон терма жамоаси жаҳон чемпионатида иштирок этиши мумкинлигини, бироқ хавфсизлик нуқтаи назаридан бу тўғри бўлмаслигини ёзди. У шунингдек, жамоа қатнашадиган бўлса, унинг хавфсизлиги масаласидан хавотирда эканини ҳам билдирган.

Аввалроқ Халқаро футбол федерацияси президенти Жанни Инфантино АҚШ президенти Дональд Трамп билан учрашуви чоғида Эрон терма жамоаси жаҳон чемпионатида тўлиқ иштирокчи сифатида қабул қилинишини тасдиқлаганини айтган эди.

Шу билан бирга, Эрон футбол федерацияси раҳбари Меҳди Таж Эрон давлат телевидениесига берган интервьюсида эркаклар терма жамоасининг турнирдаги иштирок этишини шубҳа остига қўйди ҳамда Австралияда ўтказилган Осиё кубоги пайтида аёллар терма жамоаси билан боғлиқ воқеани эслатиб ўтди. Кейинчалик Эрон спорт вазири Аҳмад Донямали ҳозирги геосиёсий вазиятни ҳисобга олиб, Эрон терма жамоаси АҚШда ўтадиган турнирда қатнаша олмаслигини маълум қилди.

Маълумот учун, 2026 йилги Жаҳон чемпионатида Эрон терма жамоаси Бельгия, Миср ва Янги Зеландия билан бирга “Г” гуруҳидан жой олган бўлиб, жамоанинг ўйинлари АҚШ ҳудудида ўтказилиши режалаштирилган.