Трамп Венесуэлага талаб қўйди

Америка Қўшма Штатлари Президенти Дональд Трамп Венесуэла ҳукуматига ўз фуқароларини АҚШдан олиб кетишни талаб қилди. Бу ҳақда Оқ уй раҳбари кеча, 20 сентябрь куни ўзининг Truth Social тармоғида ёзиб қолдирди.

“Минглаб одамлар бу “монстрлар” томонидан жиддий зарарланди ва ҳатто ўлдирилди. Уларни дарҳол мамлакатимиздан чиқариб юборинг ёки бошларингизга ҳисобланмайдиган нарсалар тушишини кутинг”, деган Трамп. 

Оқ уй раҳбари агар Каракас Вашингтон талабларини бажармаса, Венесуэла “ҳисоблаб бўлмайдиган бадал” тўлашини қўшимча қилган.

Жорий йилнинг 2 ва15 сентябрь кунлари Дональд Трамп АҚШ ҳарбийлари Кариб денгизининг жанубий қисмида Венесуэладан келаётган “наркотеррористлар”га зарба берилганини маълум қилди. Улар АҚШга наркотик юборишда айбланган. Президентнинг сўзларига қараганда, биринчи зарбада 11 нафар “наркотеррор”, нобуд бўлган, иккинчисида эса уч киши ҳалок бўлган. АҚШ қўшинлари томонидан йўқотишлар қайд этилмаган. Трамп Венесуэла ҳукуматини наркотрафикда кўп марта айблаб келган.
БМТ инсон ҳуқуқлари кузатувчилари АҚШ ҳаракатларини халқаро қонунчилик, шу жумладан, денгиз қонуни ва БМТ уставини бузиш сифатида қоралаган. 

Август ойида “The New York Times” Трамп яширин равишда Лотин Америкаси наркокартелларига қарши ҳарбий куч ишлатиш бўйича Пентагон (янги Уруш вазирлиги) учун директива имзолаганини ёзганди. Ўша ой охирида АҚШ Венесуэла қирғоқларига 7 та ҳарбий кемани, жумладан, учта ракетага эга эсминец ва камида битта зарба берувчи сувости кемасини, жами 4,5 минг аскар билан юборган.

АҚШ расмийлари Венесуэла Президенти Николас Мадурони наркотик савдоси билан шуғулланишда айблаб, уни ушлашга ёрдам берганлар учун 50 миллион доллар мукофот ваъда қилган. Мадуро эса Венесуэладан келаётган кемаларнинг йўқ қилинишини “сўнгги юз йилдаги АҚШ босқинининг энг жиддий таҳдиди” деб атаган. Унинг сўзларига кўра, Учинчи жаҳон уруши бошланган ва АҚШ бунга аллақачон режа тузган.