АҚШ Мадуронинг “боши учун” 50 млн доллар таклиф қилмоқда

АҚШ Венесуэла Президенти Николас Мадурони ҳибсга олишга ёрдам берадиган маълумот учун 50 млн доллар мукофот ваъда қилмоқда. Бу ҳақдаги эълонни АҚШ Бош прокурори Пэм Бонди ўзининг Х ижтимоий тармоғидаги саҳифасида жойлаштирди.

У Мадурони “хориждаги террорчилик ташкилотлари”дан фойдаланиб, АҚШга ўлимга олиб келувчи наркотиклар ва “зўравонлик” кириб боришига сабаб бўлаётганликда айблаган.

“У дунёдаги энг йирик наркотик савдогарларидан бири ва миллий хавфсизлигимизга таҳдид. Шунинг учун биз унинг ҳибсга олиниши билан боғлиқ маълумот учун мукофотни икки баробар оширяпмиз”, дейди Бош прокурор.

Маълумот учун, 2020 йилда, яъни Дональд Трампнинг биринчи президентлик даврида АҚШ Мадурони наркотерроризм ва мамлакатга кокаин олиб кириш мақсадида фирибгарлар билан тил бириктиришда айблаган. Ўшанда Венесуэла Президентига нисбатан адолат қарор топишига олиб келадиган маълумот учун АҚШ 15 миллион доллар таклиф қилган, кейин бу сумма 25 миллион долларга оширилган.

Шунингдек, Трамп Мадурони бир неча бор диктатор деб атаган. Шу йил бошида эса Президент лавозимига киришганидан сўнг Венесуэла нефтини қазиб олиш ва етказиб беришга рухсатни бекор қилган ҳамда жиноий тўда аъзолари дея гумон қилинган венесуэлалик муҳожирларни оммавий равишда депортация қилишни бошлаган.

Маълумот учун, 2024 йил 28 июлда Венесуэлада президентлик сайловлари бўлиб ўтди. Расмий маълумотларга кўра, мамлакатнинг амалдаги Президенти Николас Мадуро ғалаба қозонди ва учинчи муддатга қайта сайланди. Мухолифатга кўра, Эдмундо Гонсалес 70 фоиздан ортиқ овоз тўплаган ҳолда ғалаба қозонди. Мухолифат сайлов участкаларининг 80% дан ортиғининг протоколларини эълон қилди, бу эса Гонсалес сайловда сезиларли фарқ билан ғалаба қозонганини кўрсатди. Мадурони ғолиб деб эълон қилган Миллий сайлов кенгаши эса протоколларни эълон қилмаган. Мухолифат эса бу натижаларни сохталаштирилган деб ҳисоблашини билдирган. Шундан сўнг мамлакатда оммавий норозиликлар бошланган. 

Кейинчалик АҚШ ҳукумати президентлик сайлови якунлари “Венесуэла халқининг иродасини акс эттирмайди” дея баёнот берди. АҚШда ғолиб сифатида мухолифат етакчиси Эдмундо Гонсалес Уррутия тан олинган.

Бундан ташқари, ўтган йил кузда АҚШ ҳукумати Мадуронинг самолётини мусодара қилди. Венесуэлада эса бу ҳаракат “қароқчилик” деб баҳоланди. Қайд этиш жоиз, Мадуро 2013 йилдан бери Венесуэлада ҳокимият тепасида турибди.