Трамп сайловчилар қўллови бўйича Ҳаррисни ортда қолдирди

АҚШнинг собиқ раҳбари, Республикачилар партиясидан мамлакат президентлигига номзод Дональд Трамп Демократлар партиясидан кўрсатилган номзод Камола Ҳаррисдан сайловчилар ўртасидаги қўллаб-қувватлаш бўйича 2 фоизга ўзиб кетди. Бу ҳақда “Rasmussen Reports” тадқиқот ташкилоти хабар берди.

Мутахассисларнинг фикрича, сўров иштирокчиларининг 48 фоизи президентлик сайловларида Трампни қўллаб-қувватлашга тайёр, Ҳаррис эса респондентларнинг 46 фоизи томонидан маъқулланган. Иштирокчиларнинг 3 фоизи бошқа номзодга овоз беришини айтган, яна 3 фоизи жавоб беришда бир қарорга келмаган. 15, 18 ва 21 август кунлари ўтказилган шунга ўхшаш сўровда Трамп Ҳаррисдан 3 фоизга олдинда эди. Унга кўра, Трамп 49 фоиз ва Ҳаррис 46 фоизи респондентлар томонидан қўллаб-қувватланган.

Қайд этилишича, охирги сўровнома 25-28 август кунлари ўтказилган. Унда 1,9 мингга яқин америкалик сайловчилар иштирок этган.

Эслатиб ўтамиз, аввалроқ Ҳаррис Трамп билан 4 сентябрь куни “Fох News” телеканали мезбонлик қилиши керак бўлган сайловолди дебатида қатнашишдан бош тортган эди.