Трамп Путиндан кейин Зеленский билан ҳам гаплашди

АҚШ Президенти Дональд Трамп Украина Президенти Владимир Зеленский билан телефон орқали мулоқот қилганини билдирди. Бу ҳақда у ўзининг Truth Social ижтимоий тармоғидаги саҳифасида маълум қилди.

Унинг сўзларига кўра, суҳбат тахминан бир соат давом этган.

“Музокараларнинг асосий қисми кеча Президент Путин билан бўлган суҳбатга асосланди. Унда Россия ва Украина эҳтиёжлари ҳамда талабларини мувофиқлаштириш масаласи кўриб чиқилди. Биз тўғри йўлдамиз ва мен Давлат котиби Марко Рубио ҳамда Миллий хавфсизлик бўйича маслаҳатчи Майкл Уолтцни муҳокама қилинган масалалар бўйича аниқ баёнот беришга чақираман. Ушбу баёнот яқин орада эълон қилинади”, деб ёзди Трамп.

Қайд этиш жоиз, Трамп қайта Президентликка киришганидан сўнг, февраль ойида ҳам дастлаб Владимир Путин, кейин эса Зеленский билан гаплашган эди.

Эслатиб ўтамиз, кеча, 18 март куни Владимир Путин ва Дональд Трамп ўртасида телефон орқали мулоқот бўлиб ўтганди. Суҳбат Москва вақти билан тахминан соат 17:00 да бошланган ва икки ярим соат давом этган. Мулоқот давом этаётган пайтда Оқ уй аппарати раҳбарининг ўринбосари Дэн Скавино уни “яхши ўтмоқда” деб таъкидлаган. Мулоқотда Дональд Трамп томонлар ўртасида 30 кун давомида энергетика инфратузилмасига зарба беришдан воз кечиш таклифини илгари сурган. Владимир Путин бу ташаббусга ижобий муносабат билдирган ва Россия ҳарбийларига тегишли кўрсатмалар берган. Шунингдек, улар Яқин Шарқ минтақасини келажакдаги можароларнинг олдини олиш учун ҳамкорлик майдони сифатида муҳокама қилган ҳамда стратегик қуролларнинг тарқалишини тўхтатиш зарурлигини таъкидлаб, ушбу масалада кенг қамровли чоралар кўриш учун бошқа томонлар билан ҳамкорлик қилишга келишиб олган.