Трамп Путиндан кейин Зеленскийга ҳам сим қоқди

АҚШ Президенти Дональд Трамп кеча, 12 февраль куни Россия етакчиси Владимир Путин билан суҳбатлашганидан сўнг Украина Президенти Владимир Зеленский билан ҳам телефон орқали мулоқот қилди. Бу ҳақда Трамп ўзининг Truth Social тармоғида маълум қилди.

Америка етакчиси телефон мулоқотини яхши ўтди деб баҳолади.

“Мен ҳозиргина Украина Президенти Владимир Зеленский билан суҳбатлашдим. Суҳбат жуда яхши ўтди. У ҳам, Президент Путин ҳам тинчликка эришишни истайди. Биз уруш билан боғлиқ кўплаб мавзуларни муҳокама қилдик, бироқ асосан жума куни Мюнхенда бўлиб ўтадиган учрашув ҳақида гаплашдик. Делегацияга вице-президент Жей Ди Вэнс ва Давлат котиби Марко Рубио раҳбарлик қилади. Умид қиламанки, ушбу учрашув натижалари ижобий бўлади. Бу бемаъни урушни тўхтатиш вақти келди, у беҳисоб ва мутлақо кераксиз ўлим ва вайронагарчиликларга сабаб бўлди. Худо Россия ва Украинани  асрасин!” деб ёзди Трамп.

Зеленскийнинг маслаҳатчиси Дмитрий Литвиннинг сўзларига кўра, Трамп ва Зеленский тахминан бир соат давомида суҳбатлашган. Зеленский телефон суҳбати юзасидан изоҳ берар экан, Трамп уни Россия Президенти билан аввалроқ бўлиб ўтган музокаралар ҳақида хабардор қилганини маълум қилди.

“Узоқ суҳбат. Тинчликка эришиш имконияти ҳақида. Жамоалар даражасида ҳамкорлик қилишга тайёргарлигимиз ҳақида. Технологик имкониятларимиз, хусусан, дронлар ва бошқа замонавий ишлаб чиқариш ҳақида. Биз Скотт Бессант билан бўлган суҳбатимиз ва хавфсизлик, иқтисодий ҳамкорлик ҳамда ресурслар бўйича янги келишувимизга тайёргарлик масаласини муҳокама қилдик. Президент Трамп мени Путиннинг гаплари тафсилотларидан хабардор қилди”, деди Украина Президенти.

Шунингдек, Зеленскийга кўра, Украина тинчликни ҳаммадан кўра кўпроқ хоҳлайди. Россия тажовузини тўхтатиш ва ишончли, узоқ муддатли тинчликни таъминлаш бўйича Америка билан умумий қадамлар белгилаб олиняпти.

“Президент Трамп айтганидек, let’s get it done. Кейинги алоқалар ва учрашувлар борасида келишиб олдик”, дея қўшимча қилди Зеленский.

Эслатиб ўтамиз, аввалроқ Владимир Путин Дональд Трамп билан телефон орқали музокара ўтказган эди. Трамп сўнгги ҳафталарда Россия Президенти билан гаплашиш режаларини бир неча бор таъкидлаган. Америка раҳбари Украинадаги можарога катта эътибор қаратган ва уни тугатишга ёрдам бериш истагини билдирган. Россия Президенти эса Трампнинг Москва ва Вашингтон биргаликда ишлаши кераклиги ҳақидаги фикрига қўшилишини айтган. Россия ва АҚШ етакчилари телефон суҳбатида Яқин Шарқдаги келишув, Эрон ядро дастури ва Россия-Америка муносабатларини муҳокама қилган.