Путин ва Трамп Яқин Шарқ борасида ҳам келишиб олди

Аввалроқ, АҚШ Президенти Дональд Трамп ва Россия Президенти Владимир Путин Украинадаги урушда тинчлик ва ўт очишни тўхтатиш зарурати ҳақида суҳбатлашгани хабар қилинганди. Мазкур мулоқот бўйича Оқ уй матбуот котиби Кэролайн Ливитт ҳам баёнот берди.

Унинг билдиришича, иккала лидер ҳам бу можарога барҳам берилиши ва у барқарор тинчлик билан якунланиши кераклигини таъкидлаган. Улар, шунингдек, АҚШ ва Россия ўртасидаги икки томонлама муносабатларни яхшилаш зарурлигини қайд этган. Ушбу уруш давомида Украина ва Россия томонидан сарфланаётган инсоний ва моддий ресурслар ўз халқлари эҳтиёжларига йўналтирилиши лозимлиги алоҳида таъкидланган.

“Бу можаро умуман бошланмаслиги керак эди ва узоқ вақт олдин чин дилдан ва самимий тинчлик саъй-ҳаракатлари билан якунланиши лозим эди. Лидерлар тинчлик йўлида ҳаракат қилиш энергия ва инфратузилма объектларига ҳужумларни тўхтатиш билан бошланиши, шунингдек, Қора денгизда ҳарбий ҳаракатларини тўхтатиш бўйича техник музокаралар олиб борилиши, тўлиқ ўт очиш тўхтатилиши ва доимий тинчлик ўрнатилиши лозимлиги бўйича келишиб олдилар”, дейилади баёнотда.

Билдирилишича, етакчилар Яқин Шарқ минтақасини келажакдаги можароларнинг олдини олиш учун ҳамкорлик майдони сифатида муҳокама қилган. Улар стратегик қуролларнинг тарқалишини тўхтатиш зарурлигини муҳокама қилиб, ушбу масалада кенг қамровли чоралар кўриш учун бошқа томонлар билан ҳамкорлик қилишга келишиб олган. Иккала лидер ҳам Эрон ҳеч қачон Исроилни йўқ қилиш имкониятига эга бўлмаслиги кераклиги ҳақидаги қарашни баҳам кўрган.

Шунингдек, лидерлар келажакда АҚШ ва Россия ўртасидаги яхшиланган икки томонлама муносабатлар улкан имкониятларга эга бўлишини қайд этган. Бунга катта иқтисодий битимлар ва тинчлик ўрнатилганидан сўнг геосиёсий барқарорлик ҳам киради.