Трамп ой охирида Ким билан учрашиши мумкин – ОАВ

АҚШ Президенти Дональд Трамп маъмурияти Шимолий Корея етакчиси Ким Чен Ин билан учрашув ташкил этишга тайёргарлик кўрмоқда. Ушбу учрашув Трампнинг Осиёга қиладиган сафари чоғида бўлиб ўтиши мумкин. Бу ҳақда ўз манбаларига таяниб, CNN хабар берди.

Телеканалга кўра, ҳозирча учрашувни ташкил этиш учун зарур бўлган логистик режалаштириш ишлари жиддий босқичга ўтмаган. Расмийлар бунга сабаб сифатида Вашингтон ва Пхеньян ўртасида ҳеч қандай алоқа йўқлигини, Трампнинг биринчи президентлик даврида эса бундай мулоқот баъзида мавжуд бўлганини эслатган. Манбага кўра, Трампнинг бу йил бошида Шимолий Корея раҳбарига юборган дастлабки сўрови жавобсиз қолган.

Қайд этилишича, Трампнинг Ким Чен Ин билан учрашиш борасидаги шахсий қизиқиши жорий йилнинг август ойида Жанубий Корея Президенти Ли Чжэ Мён билан Оқ уйда ўтказилган учрашувдан сўнг пайдо бўлган. Ўша учрашувда Жанубий Корея раҳбари Трампни мамлакатида бўлиб ўтадиган Осиё-Тинч океани иқтисодий ҳамкорлиги (APEC) савдо вазирлари йиғилишига таклиф қилган. 

“Yonhap” жорий йилнинг 1 октябрь куни Оқ уй ходимига таяниб, Трамп Ким Чен Ин билан музокараларга тайёр эканини хабар қилган. Манбага кўра, Вашингтон биринчи марта АҚШ Президенти эҳтимолий мулоқот учун ҳеч қандай шарт қўймаётганини билдирган. Жанубий Корея расмийлари Трамп ва Ким Чен Ин учрашуви 31 октябрь – 1 ноябрь кунлари Жанубий Кореянинг Кёнджу шаҳрида ўтадиган APEC саммити доирасида бўлиб ўтиши мумкинлигини истисно этмаган. Шунингдек, ОАВ Трамп Шимолий Корея раҳбари билан яна 2019 йилдагидек Жанубий ва Шимолий Корея чегарасида учрашиш эҳтимолини ҳам рад этмаяпти.

Эслатиб ўтамиз, аввалроқ Ким Чен Ин агар Вашингтон “денуклеаризацияга бўлган иштиёқи”дан воз кечса, АҚШ билан мулоқотга ҳеч қандай тўсиқ кўрмаслигини айтганди. Унинг таъкидлашича, Пхеньян ҳеч қачон ўз ядровий арсеналини санкцияларни бекор қилиш учун алмаштирмайди. Унинг сўзларига кўра, санкциялар “сабоқ” бўлиб, мамлакатни янада кучлироқ ва мустаҳкамроқ қилган.