Трамп Эроннинг барча нефть қудуқларини йўқ қилиш билан таҳдид қилди

АҚШ Президенти Дональд Трамп Эроннинг барча нефть қудуқлари ва Харг оролини йўқ қилиш билан таҳдид қилди. Бу ҳақда у ўзининг Truth Social ижтимоий тармоғидаги саҳифасида ёзди.

“Америка Қўшма Штатлари Эрондаги ҳарбий амалиётларимизни тўхтатиш бўйича янги ва оқилона режим билан жиддий музокаралар олиб бормоқда. Сезиларли натижаларга эришилди”, деб ёзди Америка етакчиси.

Дональд Трамп тез орада можарони ҳал қилиш бўйича келишув қабул қилинишини тахмин қилган.

“Агар бирор сабабга кўра яқин орада келишувга эришилмаса ва Ҳормуз бўғози зудлик билан “бизнес учун очилмаса”, биз Эрондаги “ташрифимизни” уларнинг барча электр станциялари, нефть қудуқлари ва Харг оролини (эҳтимол, барча чучутиш қурилмаларини ҳам) портлатиб, бутунлай йўқ қилиш билан якунлаймиз. Биз ҳозиргача уларга атайлаб “тегмагандик”, дея таҳдид қилди Оқ уй раҳбари.

Эслатиб ўтамиз, аввалроқ ОАВ АҚШнинг 15 банддан иборат тинчлик режасини эълон қилган эди. Ҳужжат Эроннинг ядровий дастур ва ядровий қуролдан воз кечишини, шунингдек, Эрон армиясини чеклаш ва санкцияларни бекор қилишни ўз ичига олган.

Бунга жавобан Эрон ўз ўрнида бешта талабни илгари сурди. Улар Исроил ва АҚШ томонидан “тажовуз ва қотилликлар”ни тўлиқ тўхтатишни, Эроннинг Ҳормуз бўғозига бўлган суверен ҳуқуқини тан олишни, шунингдек, кафолатлар ва товон пули тўланишини ўз ичига олади.

Шунингдек, АҚШ Президенти Дональд Трамп “Financial Times” газетасига берган интервьюсида Эрон нефтини ўз назоратига олиш истаги ҳақида гапирган.