АҚШ Эронга 15 бандли тинчлик режасини юборди

АҚШ Эронга Яқин Шарқдаги урушни тўхтатиш бўйича 15 банддан иборат тинчлик режасини юборди. Бу ҳақда “The New York Times” хабар берди.

Маълумотларга қараганда, ҳужжат Покистон орқали Эрон раҳбариятига етказилган.

N12 телеканалининг маълум қилишича, режа доирасида Эрон ядровий қурол ишлаб чиқишдан воз кечиши ва бойитилган уран захираларини Халқаро атом энергияси агентлигига топшириши керак.

ОАВнинг ёзишича, АҚШ президентининг махсус вакили Стив Уиткофф Президент Дональд Трампга Эрон ушбу режанинг айрим муҳим бандларига, жумладан юқори даражада бойитилган уранни топшириш масаласига рози бўлганини билдирган. Бироқ Теҳроннинг расмий жавоби ҳозирча эълон қилинмаган. Шунингдек, бу режага Исроилнинг муносабати ҳам аниқ эмас – у АҚШ билан бирга бир неча ҳафтадан бери Эрон ҳудудига зарбалар бериб келмоқда.

Қайд этиш жоиз, 23 март куни Трамп Эрон билан “самарали музокаралар” ўтказилганини айтиб, мамлакат энергетика инфратузилмасига зарбаларни 5 кунга тўхтатишни буюрган эди. Аммо Эрон томони бундай музокаралар бўлганини инкор қилмоқда.

Шу билан бирга, Эрон Ташқи ишлар вазирлиги БМТ Хавфсизлик Кенгаши ва Халқаро денгиз ташкилотига мурожаат қилиб, “душман бўлмаган” кемаларга Ҳормуз бўғози орқали ўтишга рухсат берилишини маълум қилган. Бунинг учун кемалар Эрон билан олдиндан келишиб олиши ва хавфсизлик қоидаларига амал қилиши керак.

Ҳозирда уруш сабабли ушбу бўғоз орқали ўтадиган, дунё нефти ва суюлтирилган газининг қарийб 20 фоизини ташкил этувчи ташувлар деярли тўхтаб қолган.