Трамп энди Украина энергетика объектларига эгалик қилмоқчи

Кеча, 19 март куни АҚШ Президенти Дональд Трамп Украина Президенти Владимир Зеленский билан телефон орқали мулоқот қилганини билдириб, Давлат котиби Марко Рубио ҳамда миллий хавфсизлик бўйича маслаҳатчи Майкл Уолтцни Зеленский билан муҳокама қилинган масалалар бўйича аниқ баёнот беришга чақирганди. Ўша баёнот Оқ уй сайтида эълон қилинди.

Рубио ва Уолтцнинг баёнотида қайд этилишича, телефон суҳбати чоғида Трамп Зеленский билан “Украинанинг электр таъминоти ва атом электр станциялари”ни муҳокама қилган ва “Қўшма Штатлар электр энергияси ва коммунал соҳадаги тажрибаси туфайли бу станцияларни бошқаришда жуда ёрдам бериши мумкинлигини айтган”.

“Ушбу электр станцияларига Америка эгалик қилиши бу инфратузилма учун энг яхши ҳимоя ва Украина энергетика инфратузилмасини қўллаб-қувватлаш бўлади”, дейилади расмий баёнотда.

Оқ уй матбуот котиби  Кэролайн Ливиттнинг айтишича, Зеленский “фуқароларини ҳимоя қилиш учун қўшимча ҳаво мудофаа тизимларини, хусусан, Patriot ракета тизимларини” сўраган ва Трамп “мавжуд вариантларни топиш учун у билан ишлашга рози бўлган.

north_east

Украинада қандай ноёб минерал ресурслар бор ва улар Трампга нима учун керак?

“Трамп ва Зеленский, шунингдек, Курскдаги вазиятни муҳокама қилишди ва жанг майдонидаги вазият ўзгаргани учун ҳарбий штаблари ўртасида яқиндан маълумот алмашишга келишиб олди. Шунингдек, Трамп Россияга олиб кетилган украиналик болаларни қайтариш масаласида ҳар икки томон билан яқиндан ишлашга ваъда берди”, деди Ливитт.

АҚШ Энергетика вазири Крис Райт “Fox News” телеканалига берган интервьюсида Қўшма Штатлар Украина атом электр станциясини ўз назоратига олишга қодирлигини айтди.

“Биз буни қила оламиз. Биз АҚШда бу станцияларни бошқариш учун жуда кўп техник тажрибага эгамиз. Бунинг учун маҳаллий мутахассислар керак эмас деб ўйлайман”, деди у.

Эслатиб ўтамиз, кеча, 18 март куни Владимир Путин ва Дональд Трамп ўртасида телефон орқали мулоқот бўлиб ўтганди. Суҳбат Москва вақти билан тахминан соат 17:00 да бошланган ва икки ярим соат давом этган. Мулоқот давом этаётган пайтда Оқ уй аппарати раҳбарининг ўринбосари Дэн Скавино уни “яхши ўтмоқда” деб таъкидлаган. Мулоқотда Дональд Трамп томонлар ўртасида 30 кун давомида энергетика инфратузилмасига зарба беришдан воз кечиш таклифини илгари сурган. Владимир Путин бу ташаббусга ижобий муносабат билдирган ва Россия ҳарбийларига тегишли кўрсатмалар берган. Шунингдек, улар Яқин Шарқ минтақасини келажакдаги можароларнинг олдини олиш учун ҳамкорлик майдони сифатида муҳокама қилган ҳамда стратегик қуролларнинг тарқалишини тўхтатиш зарурлигини таъкидлаб, ушбу масалада кенг қамровли чоралар кўриш учун бошқа томонлар билан ҳамкорлик қилишга келишиб олган.