Трамп билан фақат Запорожье АЭС ҳақида гаплашдик – Зеленский

Украина Президенти Владимир Зеленский кеча, 19 март куни АҚШ етакчиси Дональд Трамп билан телефон мулоқотида фақат Запорижье атом электр станцияси атрофидаги вазият муҳокама қилинганини айтди. Бу ҳақда кеча, 19 март куни журналистлар билан видеоконференцалоқа пайтида маълум қилди.

“Масала фақат вақтинчалик ишғол остида бўлган станцияга тегишли эди. Станция ишламаяпти, чунки Россия уни бутунлай ноқонуний ушлаб турибди”, деди Украина раҳбари.

Зеленскийнинг сўзларига кўра, суҳбат давомида Украина бу станцияни қайта тиклашга қодирми, деган савол кўтарилган. Зеленский у ерда тегишли инфратузилма, сув таъминоти ва техник ходимлар бўлиши кераклигини таъкидлаган.

north_east

Трамп энди Украина энергетика объектларига эгалик қилмоқчи

“Биз фақат битта станция ҳақида гаплашдик. “Президент [Трамп] сўради: “агар Америка буни қайта тиклаши мумкин деган тушунча мавжуд бўлса-чи?” Мен унга айтдим: ҳа, агар уни модернизация қилиш мумкин бўлса. Буни сиз билан муҳокама қилишга тайёрмиз. Аммо биз фақат вақтинча Россия томонидан босиб олинган бир станция ҳақида гаплашган эдик”, деди Украина раҳбари.

DPA агентлигининг ёзишича, айни пайтда Трамп хавфсизлик нуқтаи назаридан АҚШ Украинадаги тўртта атом электр станцияси бошқарувини ўз қўлига олиши мумкинлигини даъво қилмоқда.

АҚШ Давлат котиби Марко Рубио ва миллий хавфсизлик бўйича маслаҳатчи Майкл Уолтц 19 март куни АEСга эгалик ҳуқуқининг АҚШга ўтказилиши Украина энергетика инфратузилмаси учун энг яхши ҳимоя бўлишини билдирди.

19 март куни бўлиб ўтган суҳбат чоғида Владимир Зеленский Вашингтоннинг энергия ва бошқа фуқаролик инфратузилмаларига ҳужумларни тўхтатиш ҳақидаги таклифини қўллаб-қувватлашини маълум қилди.

Эслатиб ўтамиз, 18 март куни АҚШ Президенти Дональд Трамп ва Россия Президенти Владимир Путин телефон орқали суҳбатлашганди – Трампнинг амалдаги президентлик муддати бошланганидан бери тасдиқланган иккинчиси – улар Россия томонидан Украинага қарши бошланган урушда сулҳ ўрнатиш имкониятини муҳокама қилишди.

Оқ уй раҳбари Владимир Путин билан телефон суҳбатидан сўнг ўзининг Truth Social ижтимоий тармоғида шундай ёзди:

“Биз тўлиқ ўт очишни тўхтатиш ва охир-оқибатда Россия ва Украина ўртасидаги даҳшатли урушни тугатиш йўлида тезда ҳаракат қилишимизни англаган ҳолда барча энергетика ва инфратузилма объектларида зудлик билан ўт очишни тўхтатишга келишиб олдик”.

Путин, шунингдек, ҳар томондан 175 кишидан иборат формулага кўра, Украина билан янги ҳарбий асирларни алмашиш, шунингдек, оғир яраланган 23 нафар украиналик аскарни ўз ватанларига қайтаришга рухсат берди.

Бунинг эвазига у Қўшма Штатлардан Киевга ҳарбий ёрдам кўрсатиш ва разведка маълумотларини узатишни бутунлай тўхтатишни талаб қилди. Бу, Кремль матбуот баёнотига кўра, Россия Федерациясининг тинч йўл билан келишувни бошлаш талабларидан биридир.