Энергетика ва инфратузилмага ўт очишни тўхтатишга келишиб олдик – Трамп

АҚШ Президенти Дональд Трамп Россия Президенти Владимир Путин билан энергетика ва инфратузилма масалаларида зудлик билан ўт очишни тўхтатишга келишиб олганини айтди. Бу ҳақда у кеча, 18 март куни Truth Social ижтимоий тармоғида ёзди.

Трамп Россия Президенти билан телефон мулоқоти жуда “яхши ва самарали” бўлганини таъкидлади.

“Биз энергетика ва инфратузилманинг барча соҳаларида зудлик билан ўт очишни тўхтатишга келишиб олдик”, деб ёзади у.

Тўлиқ ва кенг қамровли ўт очишни тўхтатиш учун жараёнда бошқа музокаралар давом этишини таъкидлаган Трамп “Россия ва Украина ўртасида тўлиқ ўт очишни тўхтатишга эришиш ва охир-оқибат урушни тугатиш учун биргаликда ҳаракат қилиш”га келишиб олганини қўшимча қилди.

“Агар мен Президент бўлганимда бу уруш ҳеч қачон бошланмасди! Тинчлик шартномасининг кўплаб элементлари муҳокама қилинди, шу жумладан, минглаб аскарлар ҳалок бўлаётган. Президент Путин ҳам, Президент Зеленский ҳам бунинг тугашини хоҳлайди. Бу жараён ҳозир ишлаяпти, умид қиламанки, инсоният учун бу ишни якунлаймиз”, деди Трамп.

Оқ уй, ўз навбатида, томонлар Россия-Украина уруши “узоқ муддатли тинчлик” билан якунланиши ва кенг қамровли музокаралар давом этиши кераклиги ҳақида келишиб олганини маълум қилди.

Эслатиб ўтамиз, кеча, 18 март куни Владимир Путин ва Дональд Трамп ўртасида телефон орқали мулоқот бўлиб ўтганди. Суҳбат Москва вақти билан тахминан соат 17:00 да бошланган ва икки ярим соат давом этган. Мулоқот давом этаётган пайтда Оқ уй аппарати раҳбарининг ўринбосари Дэн Скавино уни “яхши ўтмоқда” деб таъкидлаган. Мулоқотда Дональд Трамп томонлар ўртасида 30 кун давомида энергетика инфратузилмасига зарба беришдан воз кечиш таклифини илгари сурган. Владимир Путин бу ташаббусга ижобий муносабат билдирган ва Россия ҳарбийларига тегишли кўрсатмалар берган. Шунингдек, улар Яқин Шарқ минтақасини келажакдаги можароларнинг олдини олиш учун ҳамкорлик майдони сифатида муҳокама қилган ҳамда стратегик қуролларнинг тарқалишини тўхтатиш зарурлигини таъкидлаб, ушбу масалада кенг қамровли чоралар кўриш учун бошқа томонлар билан ҳамкорлик қилишга келишиб олган.