Тожикистонда фарзандларини тиланчиликка ундаган аёлнинг болалари олиб қўйилди

Тожикистоннинг Сино туманида тиланчилик қилиб келган ва сарсон-саргардонликда яшаётган  икки вояга етмаган бола онасидан олиб қўйилди. Бу ҳақда “Asia-Plus” хабар берди.

Текширув давомида болаларнинг онаси С.М. оилада носоғлом турмуш тарзини олиб боргани, болаларни мунтазам равишда жисмоний ва руҳий зўравонликка дучор қилгани, шунингдек, уларни садақа сўрашга мажбурлагани аниқланган. Шу билан бирга, уларнинг юзи ва танасида калтакланиш излари топилган.

Шу муносабат билан Сино тумани суди аёлга нисбатан Тожикистон Оила кодексининг 73-моддасини қўллаб, уни оналик ҳуқуқидан маҳрум қилди. Болалар Душанбе шаҳридаги давлат таълим муассасасига хавфсиз таълим ва тарбия учун топширилган.

Эслатиб ўтамиз, аввалроқ Ўзбекистонда охирги 3 йилда 2 мингдан ортиқ фуқаро судлар томонидан ота-оналик ҳуқуқидан маҳрум қилингани, шундан 86 фоизи ота-оналик мажбуриятларини бажаришдан бош тортгани учун жавобгарликка тортилгани ҳақида хабар берилганди.