Тошкент вилоятида 33 ёшли аёлни Россияга фоҳишаликка жўнатмоқчи бўлган шахс ушланди (видео)

Тошкент вилоятида 33 ёшли аёлни фоҳишалик учун Москвага жўнатаётган шахс ушланди. Бу ҳақда Ички ишлар вазирлиги хабар берди. 

Маълум қилинишича, ўтказилган тезкор тадбирда Янгийўл шаҳрида яшовчи 1990 йилда туғилган аёл осон пул топиш мақсадида ўзига таниш бўлган Сергели туманида яшовчи 33 ёшли аёлни алдаб, мўмай даромад топишга ишонтириб, Тошкент халқаро аэропорти орқали Россиянинг Москва шаҳрига фоҳишалик учун жўнатаётган вақтида далилий ашёлар билан ушланган. 

Ҳолат юзасидан ушланган шахсга нисбатан Жиноят кодексининг 135-моддаси (одам савдоси) билан жиноят иши қўзғатилган. Тергов ҳаракатлари олиб борилмоқда.

Маълумот учун, одам савдоси жиноятини содир қилган шахслар 5 йилгача озодликни чеклаш ёки 15 йилгача озодликдан маҳрум қилиш билан жазоланиши мумкин.

Эслатиб ўтамиз, аввалроқ Тошкент халқаро аэропортида 31, 23 ва 18 ёшли қизларни Таиландга фоҳишалик учун юбораётган 53 ёшли аёл қўлга тушганди. Ушбу аёлга ҳам Жиноят кодексининг 135-моддаси билан жиноят иши қўзғатилган.