Тошкент метросининг иш вақти 2,5 соатга қисқартирилди

Тошкент метрополитенининг Ер усти ҳалқа йўли йўналишида 17-19 июль кунлари поездлар ҳаракати вақтинча соат 06:00 дан 22:30 гача амалга оширилади. Бу ҳақда “Тошкент метрополитени” ДУК хабар берди.

Маълум қилинишича, мазкур чеклов йўловчилар хавфсизлигини таъминлаш мақсадида Ер усти ҳалқа йўли йўналишидаги бекатларнинг техник ҳолатини қўшимча равишда батафсил назоратдан ўтказиш билан боғлиқ.

Қайд этилишича, ушбу муддат давомида Ер усти ҳалқа йўли йўналишидаги 14 та бекатнинг конструктив ва техник ҳолати мутахассислар томонидан белгиланган тартибда синчковлик билан кўздан кечирилади.

Метрополитен маълумотига кўра, профилактик тадбирлар инфратузилманинг ишончли фаолиятини таъминлаш, мавжуд ҳолатни чуқур таҳлил қилиш ҳамда йўловчилар учун янада хавфсиз ва қулай шароитлар яратишга қаратилган.

Эслатиб ўтамиз, кеча, 16 июль куни Тошкент метросининг “Турон” метро бекатида том конструкциясининг бир қисми қулаб тушиши оқибатида икки киши ҳалок бўлган эди.