Тиббиёт ходими ордер сўраб борган аёлга жинсий яқинликни таклиф қилди

Сурхондарё вилоятининг Термиз тумани Тиббиёт бирлашмасида ташкилий методика бўлими бошлиғи бўлиб ишлаган шахс ногиронликдан даволаниш учун ордер сўраб мурожаат қилган аёлга жинсий яқинликни таклиф қилгани учун 3 суткага қамалди. QALAMPIR.UZ суд ҳужжати билан танишди.

Маълум бўлишича, воқеа жорий йилнинг 10 август куни Термиз тумани Тиббиёт бирлашмасида содир бўлган. Шифокор Х.Э. нинг қабулига ордер сўраб келган аёл фуқаро Ш.А. га жинсий яқинлик қилишни таклиф сифатида айтган. Судда ҳуқуқбузар айбига иқрор бўлиб, қилган ишидан пушаймонлигини билдирган. У ҳозирда ишсиз эканини маълум қилган.

Жабрланувчи Ш.А. ҳам судда воқеани тасдиқлаган. Унинг айтишича, у ордер олиш мақсадида шифокор Х.Э. нинг қабулига борганида, унга жинсий яқинлик қилиш учун таклиф билдирилган. Кейинчалик ҳуқуқбузар ундан кечирим сўрагани сабабли унга нисбатан даъвоси йўқлигини айтган.

Суд Х.Э. нинг айбини унинг иқрори, жабрланувчининг кўрсатмалари, 112 рақамига қилинган мурожаат ва ишдаги бошқа далиллар билан тасдиқланган деб топган.

Қарорга кўра, унга Маъмурий жавобгарлик тўғрисидаги кодексининг 41-1-моддаси (шаҳвоний шилқимлик қилиш) 1-қисми билан 3 сутка маъмурий қамоқ жазоси тайинланган. Суд жабрланувчи Ш.А. нинг ҳуқуқбузарга нисбатан даъвоси йўқлигини ҳам эътироф этган.

Эслатиб ўтамиз, аввалроқ Тошкент шаҳар Учтепа туманидаги клиникалардан бирида 26 ёшли тиш шифокори қабулига келган 2008 йилда туғилган қизга шаҳвоний шилқимлик қилгани ҳақида хабар берилган эди.