Tesla гуманоид роботлар ишлаб чиқаришни кўпайтиради

Tesla раҳбари Илон Маск компания Model S ва Model X электромобилларини ишлаб чиқаришни босқичма-босқич тўхтатиб, завод гуманоид Optimus роботларини ишлаб чиқаришга мослаштирилишини маълум қилди. Бу ҳақда у инвесторлар билан бўлиб ўтган суҳбатда сўз очган.

“Моҳиятан, Модель S ва X дастурларини якунлаш вақти келди”, дейди Маск.

Унинг айтишича, Tesla келаси чоракда Model X кроссовери ва Model S тўлиқ ўлчамли седанини ишлаб чиқаришни қисқартиришни режалаштирмоқда. Калифорниядаги Фримонт заводи – ҳозиргача Model S ва X ишлаб чиқарилган корхона – гуманоид Optimus роботларини ишлаб чиқариш учун қайта жиҳозланади.

Шунингдек, Маск инвесторларни 2025 йилда Tesla’нинг умумий тушуми 3 фоизга камайгани, йилнинг сўнгги уч ойида эса фойда 61 фоизга қисқаргани ҳақида хабардор қилган.

Январь ойида Хитойнинг BYD компанияси Tesla’ни ортда қолдириб, дунёдаги энг йирик электромобиль ишлаб чиқарувчисига айланди.

Бундан ташқари, Маскнинг сиёсий фаоллиги Tesla’нинг айрим мижозларини узоқлаштирди: дунёнинг турли мамлакатларида компания дилерлик марказлари олдида норозилик намойишлари бўлиб ўтди.

Tesla’нинг электромобилларга қаратилган аввалги асосий эътиборидан воз кечиши АҚШ Президенти Дональд Трампнинг ички ёнув двигателсиз автомобилларни қўллаб-қувватлашга қаратилган айрим давлат дастурларини қисқартириш қарори билан бир вақтда содир бўлди.

Бир вақтлар дунёдаги энг фойдали автокомпаниялардан бири бўлган Tesla ҳозир тобора роботакси йўналишини ҳам фаол ривожлантирмоқда. Инвесторлар билан мулоқот чоғида Маск Tesla ўзига тегишли бўлган xAI сунъий интеллект стартапига 2 миллиард доллар миқдорида сармоя киритганини ҳам маълум қилган.

Эслатиб ўтамиз, аввалроқ ҳозирда жаҳон бозоридаги одамсимон роботларнинг 80 фоиздан ортиғи Хитой ҳиссасига тўғри келаётгани ҳақида хабар берилган эди.