Танқидлар ортидан “Толибон” Саманганда университет пештоқига ўзбек тилини қайта киритди

Аввалроқ, “Толибон” муваққат ҳукумати ўзбеклар энг кўп яшовчи мамлакатнинг шимолида жойлашган Саманган университети пештоқидан ўзбек тилидаги ёзувларни олиб ташлагани, бу эса ҳақли равишда жамоатчилик норозилигига сабаб бўлгани ҳақида хабар берган эдик. Кеча, 11 январь куни университет пештоқига араб алифбосига асосланган ўзбек тилидаги ёзув қайта киритилди. Бу ҳақда QALAMPIR.UZ’га афғонистонлик ўзбеклар хабар бермоқда.

Тасдиқланган маълумотга кўра, “Толибон” 11 январь куни Саманган университетининг кириш қисмига ўзбек тилини ҳам қўшиб ҳисоблаганда тўрт тилда ёзилган лавҳани янгидан ўрнатган.

“QALAMPIR.UZ ушбу муаммони Ўзбекистонда кўтаргани ва Ташқи ишлар вазирлигининг муносабати ортидан толиблар тилимизга ҳурмат кўрсатишга мажбур бўлди, бунинг учун таҳририят ва вазирликка жанубий туркистонликлар номидан миннатдорлик билдираман”, дейди таҳририят журналисти билан суҳбатда афғонистонлик ўзбек.

Эслатиб ўтамиз, жорий йилнинг 2 январь кунига келиб, ўзбеклар энг кўп яшовчи Саманганда университет пештоқидан ўзбек ва форс тилларидаги ёзув олиб ташланди. Бунинг ортидан Ўзбекистон Ташқи ишлар вазирлиги ўзбек тилига нисбатан чекловлар вазирликда ташвиш уйғотишини билдирди. 6 январь куни Ўзбекистон Ташқи ишлар вазирлигининг масъул вакиллари тезкор равишда Афғонистон ташқи ишлар вазирлиги билан боғланганда, “Толибон” ўзбек тилига тақиқ қўймасликка ваъда берди.