“Сити” футболчисининг уйи талон-торож қилинди

“Манчестер Cити” ҳимоячиси Рубен Диашнинг уйи Чемпионлар лигаси доирасида Туркиянинг “Галатасарой” жамоасига қарши учрашув вақтида талон-торож қилинди. Бу ҳақда “Globo” нашри хабар берди.

Жорий йилнинг 28 январь куни “Манчестер Cити” Чемпионлар лигаси асосий босқичининг саккизинчи турида ўз майдонида “Галатасарой”ни 2:0 ҳисобида мағлуб этди. Португалиялик ҳимоячи Рубен Диаш жароҳати сабаб ушбу учрашувда иштирок этмади.

Манбага кўра, футболчи ўйиндан сўнг маҳаллий вақт билан соат 23:10 атрофида уйига қайтиб, унинг уйига ўғирлик қилинганини аниқлаган. Ўғрилар заргарлик буюмлари, электрон қурилмалар, кийим-кечак ва бошқа қимматбаҳо буюмларни олиб кетган.

Тахминларга кўра, қиймати қарийб 4 миллион фунт стерлинг (тахминан 4,6 миллион евро) бўлган уй видеокузатув камералари, сигнализация тизими ҳамда электр дарвозалар билан жиҳозланган бўлган. Ҳодиса юзасидан ҳуқуқни муҳофаза қилувчи органлар томонидан тергов ишлари олиб борилмоқда.

Маълумот учун, 28 ёшли Рубен Диаш 2020 йилдан буён “Манчестер Cити” сафида тўп суриб келмоқда. У инглиз клубига Португалиянинг “Бенфика” жамоасидан кўчиб ўтган. Жорий мавсумда ҳимоячи клуб сафида барча мусобақаларда 25 та ўйинда майдонга тушиб, 2 та гол муаллифи бўлди.