Шри-Ланканинг собиқ биринчи хоними қўлга олинди

Шри-Ланканинг собиқ президенти Маҳинда Ражапаксанинг рафиқаси, мамлакатнинг собиқ биринчи хоними Ширанти Ражапакса болалар шифохонаси учун йиғилган хайрия маблағларини ноқонуний ишлатиш бўйича гумонлар юзасидан ушланди. Бу ҳақда BBC хабар берди.

Қайд этилишича, 73 ёшли Ширанти Ражапакса Коломбодаги уйида коррупцияга қарши курашувчи идора ходимлари томонидан қўлга олинган. У собиқ президент билан боғлиқ “Siriliya Saviya” хайрия жамғармаси томонидан йиғилган 10 млн рупий (қарийб 30,3 минг доллар) маблағ юзасидан сўроқ қилинмоқда.

Мазкур маблағ Коломбодаги Lady Ridgeway болалар шифохонаси учун махсус сканер харид қилишга сарфланиши керак бўлган. Бироқ расмийлар шунга ўхшаш сканер Хитой ҳукумати томонидан аллақачон шифохонага топширилганини билдирган.

Ширанти Ражапакса ўзига қўйилаётган айбловларни рад этган. У маблағ ўзлаштирилмаганини билдирган. Собиқ президент Маҳинда Ражапаксанинг вакили Манож Гамаге ҳам пуллар “Siriliya Saviya” жамғармаси ҳисобларида сақланаётганини ва фирибгарлик содир этилмаганини айтган.

Маълум бўлишича, Ширанти Ражапакса жорий йилнинг 5 октябрь куни даволаниш учун бўлиб турган Сингапурдан Шри-Ланкага қайтган. У ҳибсга олинмаслик учун судга ариза берган, бироқ иш бўйича суд мажлиси 12 октябрга белгиланган.

Маълумот учун, Маҳинда Ражапакса 2005–2015 йилларда Шри-Ланка президенти бўлган. 2022 йилда мамлакатда иқтисодий инқироз ва инфляция сабабли оммавий норозиликлар бошланган ва унинг укаси Готабая Ражапакса президентлик лавозимини тарк этган.

Ҳозирги ҳукумат Ражапакса оиласи аъзоларига оид аввал тўхтаб қолган коррупция бўйича терговларни қайта тиклаган. Маҳинда ва Ширантининг катта ўғли Намал Ражапакса ҳам жорий йилда самолёт хариди билан боғлиқ иш юзасидан ҳибсга олинган. Унинг укаси Йошита ҳам коррупция айбловлари билан қўлга олинган.

Эслатиб ўтамиз, аввалроқ Жанубий Кореянинг собиқ президенти Юн Сок Ёлнинг рафиқаси Ким Гон Хи давлат лавозимларига тайинлов эвазига пора олганликда айбдор деб топилиб, 7 йил муддатга озодликдан маҳрум этилганди.