Шри-Ланкадаги қамоқхонада қонли тўқнашув: 25 киши ҳалок бўлди

Шри-Ланка пойтахти Коломбо яқинидаги Негомбо қамоқхонасида икки гуруҳ маҳбус ўртасида юз берган тўқнашувлар оқибатида камида 25 киши ҳалок бўлди, 100 дан ортиқ киши жароҳатланди. Бу ҳақда “Reuters” хабар берди.

Полиция маълумотига кўра, тартибсизликлар кеча, 5 июль куни бошланган ва бугун, 6 июль куни ҳам давом этган. Ҳалок бўлганлар орасида маҳбуслар ҳам, қамоқхона ходимлари ҳам борлиги айтилмоқда.

Манбаларга кўра, тўқнашув суд ҳукми чиқарилган маҳкумлар ва тергов остида сақланаётган маҳбуслар ўртасида юз берган. Можарога нима сабаб бўлгани ҳозирча расман маълум эмас.

Ҳудуддаги давлат шифохонасига 100 нафардан ортиқ жабрланувчи олиб борилган. Ҳозирча уларнинг олган жароҳатлари ҳақида батафсил маълумот берилмаган. Тўқнашувга нима сабаб бўлгани расман маълум эмас. Ҳодиса юзасидан суриштирув ишлари олиб борилмоқда.

Маълумот учун, Шри-Ланкадаги қамоқхоналар узоқ йиллардан буён ўта гавжумлиги билан ажралиб туради. Ҳозирда мамлакатдаги жазони ижро этиш муассасалари 10 минг кишига мўлжалланган бўлса-да, уларда 39 мингдан ортиқ маҳкум сақланмоқда.

Эслатиб ўтамиз, аввалроқ Венесуэланинг Баринас штатидаги INJUBA қамоқхонасида маҳбуслар жазони ижро этиш муассасасини эгаллаб олиб, оммавий норозилик бошлагани ҳақида хабар берилган эди.