Шавкат Мирзиёев Россия Бош вазири билан учрашди

Ўзбекистон Республикаси Президенти Шавкат Мирзиёев V Тошкент халқаро инвестиция форумида иштирок этиш учун Ўзбекистонга келган Россия Федерацияси ҳукумати раиси Михаил Мишустинни қабул қилди. Бу ҳақда Президент матбуот хизмати хабар берди.

Учрашув аввалида Михаил Мишустин Ўзбекистон раҳбарига Россия Федерацияси Президенти Владимир Путиннинг самимий саломи ва энг эзгу тилакларини етказган.

Ўзбекистон – Россия стратегик шериклик ва иттифоқчилик муносабатларини олий даражада эришилган келишувларни амалга ошириш доирасида янада ривожлантириш масалалари кўриб чиқилган.

Товар айирбошлаш барқарор ўсиб бораётгани мамнуният билан қайд этилган. Жорий йил бошидан буён унинг ҳажми 20 фоизга ошди. Энергетика, металлургия ва иқтисодиётнинг бошқа устувор тармоқларида йирик лойиҳаларни амалга ошириш давом этмоқда.

Савдо-иқтисодий ҳамкорликнинг ривожланиш суръатини сақлаб қолишга қаратилган комплекс чора-тадбирларни қабул қилиш ҳамда саноат кооперацияси лойиҳаларини қўллаб-қувватлаш масалаларига алоҳида эътибор қаратилган.

Ўзбекистон етакчиси ҳудудлар даражасидаги амалий ҳамкорликни янада кенгайтириш ҳамда маданий ва таълим алмашинуви дастурларини илгари суриш муҳимлигини таъкидлаган.

Эслатиб ўтамиз, аввалроқ Шавкат Мирзиёев Беларусь Республикаси Бош вазири Александр Турчинни қабул қилганди. Учрашув аввалида юқори мартабали меҳмон давлат раҳбарига Беларусь Республикаси Президенти Александр Лукашенконинг самимий саломи ва энг эзгу тилакларини етказган.