Россияда йўқолган самолётнинг қолдиқлари топилди (видео)

Бугун, 24 июль куни тонгда Россиянинг Амур вилоятида бедарак йўқолган “Angara” авиакомпаниясига тегишли An-24 йўловчи самолётининг ёнаётган фузеляжи Тинда шаҳри яқинида, тоғ ёнбағрида топилди. Бу ҳақда қутқарув хизматидаги манбасига таяниб, “Коммерсантъ” хабар берди.

Mi-8 вертолёти томонидан аниқланган самолёт парчалари Тиндадан 15 км узоқликда жойлашган. Айни вақтда йўловчилар тақдири ҳақида расмий маълумот мавжуд эмас.

Маълумотларга кўра, самолёт Хабаровск-Благовешенск-Тинда йўналиши бўйича парвоз қилаётган бўлиб, бортда 43 нафар йўловчи ва 6 нафар экипаж аъзоси, жами 49 киши бўлган.

Ҳодиса юзасидан Россия Тергов қўмитаси Жиноят кодексининг 263-моддаси 3-қисм 1-бандига (учиш хавфсизлиги қоидаларини бузиш, уч ёки ундан ортиқ кишининг ҳалок бўлишига олиб келган ҳолат) асосан жиноят иши қўзғатган. 

Эслатиб ўтамиз, аввалроқ Россиянинг Хабаровск ўлкасида “Взлет” авиакомпаниясига тегишли Mi-8Т вертолёти бедарак йўқолгани ҳақида хабар берилганди. Бортда 5 киши бўлган. Уларнинг 3 нафари экипаж аъзоси ва 2 нафари техник мутахассислар саналади. Вертолёт Охотск аҳоли пунктидан ҳавога кўтарилган ва Магаданга етиб бориши керак бўлган. Бироқ белгиланган вақтда экипаж билан алоқа узилган.