Россия Қозоғистонни газлаштиришга қаттиқ киришди

Бир ой ичида “Газпром” Қозоғистоннинг шимолий ва шимоли-шарқий ҳудудларини газлаштириш имкониятларини техник-иқтисодий таҳлилини якунлайди. Бу ҳақда “Газпром” раҳбари Алексей Миллер “Известия” газетасига берган интервьюсида маълум қилди. 

“Биз Қозоғистон билан Қозоғистоннинг шимолий, шимоли-шарқий вилоятларини газлаштириш масаласини муҳокама қилмоқдамиз”, дейди у. 

Унинг қайд этишича, аллақачон техник-иқтисодий асослаш ишлаб чиқилмоқда. 

“Ҳозирча техник-иқтисодий асослаш эмас, балки келгуси бир ой ичида якунлашимиз мумкин бўлган таҳлил, бу лойиҳанинг техник имкониятлари ва унинг иқтисодий самарадорлиги ҳақида жавоб беради”, дея қўшимча қилди Миллер. 

Шу билан бирга, “Газпром” раҳбари Қозоғистоннинг газ транспорти тизими анчагина маҳаллий эканлигига эътибор қаратган, шунинг учун Қозоғистоннинг шимолий ва шимоли-шарқий вилоятларини Россия ва унинг ресурс базасидан газлаштириш анча самаралироқ. 

Аввалроқ, Россия Президенти Владимир Путин Россия Қозоғистонга мамлакатнинг шимолий ва шарқий ҳудудларини газлаштиришда ёрдам беришга тайёрлигини маълум қилганди. 

Ўз навбатида, Миллер Қозоғистоннинг кўплаб вилоятлари бевосита Россия Федерацияси вилоятлари билан чегарадош бўлганлиги сабабли Россия ҳудудидан Қозоғистоннинг шимолий, шимолий-шарқий ҳудудларини газ билан таъминлаш ва газлаштириш имкониятларини ва бунинг учун янги газ ташиш йўналишларини кўриб чиқиш иқтисодий жиҳатдан самарали эканини билдирди. Айниқса, Остона шаҳрини газлаштиришни назарда тутувчи маршрут алоҳида аҳамиятга эга.

Эслатиб ўтамиз, Миллер “Известия” берган интервьюсида “Марказий Осиё – Марказ” газ қувури орқали Россия газини тескари йўналишда етказиб бериш 2025 йилнинг ноябридан кечиктирмай амалга оширилиши кераклигини айтган эди. 

Жорий йилнинг 1 ноябрь куни бўлиб ўтган Санкт-Петербург халқаро газ форуми доирасида Миллер ва Қозоғистон Республикаси Бош вазирининг биринчи ўринбосари Роман Скляр ўртасида ўтган ишчи учрашувда Стратегик ҳамкорлик шартномаси имзоланган. Ҳужжат табиий газни етказиб бериш, ташиш ва қайта ишлаш, шунингдек, уни геология-қидирув ва қазиб олиш соҳасида ҳамкорликни ривожлантиришга қаратилган.

Форумда сўз олган Миллер ҳозирда Россиянинг “Газпром” компанияси ва Қозоғистон Остона шаҳрини газлаштириш учун етказиб бериш йўналиши устида ишлаётгани, компания Қозоғистон ва Ўзбекистонга етказиб бериш ҳажмини ошириш учун янги йўналишлар ва Бухоро-Урал газ қувурини ҳам кўриб чиқаётганини билдирган.