“Газпром”нинг янги нишони Бухоро-Урал газ қувури бўлиши мумкин

Ҳозирда Россиянинг “Газпром” компанияси ва Қозоғистон Остона шаҳрини газлаштириш учун етказиб бериш йўналиши устида ишламоқда, компания Қозоғистон ва Ўзбекистонга етказиб бериш ҳажмини ошириш учун янги йўналишлар ва Бухоро-Урал газ қувурини ҳам кўриб чиқмоқда. Бу ҳақда Санкт-Петербург халқаро газ форумининг ялпи мажлисида “Газпром” раҳбари Алексей Миллер маълум қилди. 

“Биз биламизки, узоқ чегарани ҳисобга олган ҳолда – Қозоғистоннинг кўплаб ҳудудлари бевосита Россия Федерациясининг ҳудудлари билан чегарадош – ва табиийки, Қозоғистоннинг шимолий,  шимоли-шарқий вилоятларини Россия ҳудудидан газ билан таъминлаш ва газлаштириш имкониятларини кўриб чиқиш ва бунинг учун янги газ транспорти йўналишларини, хусусан, Остона шаҳрини газлаштиришни назарда тутувчи йўналишни кўриб чиқиш мақсадга мувофиқдир. Айтишим мумкинки, биз ҳозирда шундай йўналиш устида биргаликда ишлаяпмиз, техник-иқтисодий асослаш аллақачон амалга оширилган”, дейди Миллер.

Унинг қайд этишича, форумда режалаштирилган учрашувлар, жумладан, ушбу йўналишни муҳокама қилишга бағишланади. 

Газпром раҳбарининг сўзларига кўра, Қозоғистон ва Ўзбекистонга газ етказиб беришни кўпайтириш учун компания янги йўналишлар ва мавжуд Бухоро-Урал газ қувурини ҳам ўрганмоқда.  

“Марказий Осиё – Марказ” газ қувурини реконструкция қилиш доирасида келгуси йилларда нималар қилишимизни таҳлил қилишдан ташқари, биз мавжуд Бухоро – Урал газ транспорт коридорини, шунингдек, пайдо бўлиши мумкин бўлган янги газ транспорти йўналишларини ҳам кўриб чиқмоқдамиз”, дейди Миллер. 

Бундан ташқари, “Газпром” Ўзбекистон, Қозоғистон ва Қирғизистон орқали учинчи давлатларга газ транзитини истисно қилмайди.  

“Ҳа, бундай имконият ҳам мавжуд. Биз ушбу давлатлар тақдим эта оладиган транзит имкониятлари ҳақида ҳам гаплашдик. Биринчи навбатда, албатта, бу мамлакатларнинг, ҳамкорларимиз, дўстларимизнинг эҳтиёжлари. Аммо бундай имконият ҳам бор”, дейди “Газпром” раҳбари, эҳтимолий газ транзити ҳақидаги саволга жавоб бериб.

Эслатиб ўтамиз, Санкт-Петербург халқаро газ форуми доирасида Россиянинг “Газпром” очиқ акциядорлик жамияти ва Ўзбекистон ҳукумати ўртасида энергетика комплекси соҳасида ҳамкорлик бўйича стратегик меморандум имзоланди. Ҳужжатни “Газпром” раҳбари Алексей Миллер ва Ўзбекистон Энергетика вазири Жўрабек Мирзамаҳмудов имзолаган.