Роналду Саудия миллий байрамида иштирок этди (видео)

Кеча, 23 сентябрь куни португалиялик футбол афсонаси ва “Ал-Наср” жамоасининг етакчи юлдузи Криштиану Роналду Саудия Арабистони Подшоҳлигининг 95 йиллигига бағишланган байрамда иштирок этди. Бу ҳақда футболчининг ўзи Instagram саҳифасида маълум қилди.

“Саудия Арабистонидаги барчага Суадия Миллий куни муборак бўлсин. Сизга ва яқинларингизга ғурур ва байрамга тўла кунлар тилайман”, дейди Роналду.

Унинг ижтимоий тармоқларда жойлаган суратлари кузатувчиларда катта қизиқиш уйғотди. Роналду Саудия Арабистонининг узун миллий либоси ва бу йилги байрам шиори – “Бизнинг шон-шуҳратимиз табиатимизда” ёзуви туширилган яшил-қора катак шарфда кўриниш берди. Шунингдек, у мамлакат кучи ва меросининг рамзи ҳисобланган анъанавий қилични ҳам қўлида ушлаб турган суратларини жойлади.

Қайд этиш жоиз, Роналду 2023 йилда ҳам Саудиянинг Миллий кунида иштирок этган эди. Саудия Арабистони вакиллари эса бу ишорани самимий қадрлаб, уни “ҳақиқий маданият элчиси” деб атаганди.

Маълумот учун, Криштиану Роналду 2023 йилнинг январь ойидан бери “Ал-Наср” жамоаси таркибида 116 та ўйинда майдонга тушиб, 103 та гол уришга эришди.

Эслатиб ўтамиз, аввалроқ Криштиану Роналду 2016 йилдан бери бирга яшаб келаётган севгилиси Жоржина Родригесга турмуш қуришни таклиф қилгани ҳақида хабар берилган эди.