Роналду севгилисига турмуш қуришни таклиф қилди

Саудия Арабистонининг “Ал-Наср” клуби ҳамда Португалия терма жамоаси ҳужумчиси, 40 ёшли юлдуз Криштиану Роналду севгилиси Жоржина Родригесга турмуш қуришни таклиф қилди. Бу ҳақда Родригес ўзининг Instagram саҳифасида маълум қилди.

Роналдунинг бир неча йиллик севгилиси ўз саҳифасида бармоғига бриллиант узук таққан суратини жойлаштирган.

“Ҳа, мен хоҳлайман. Бу ҳаётимда ҳам, барча ҳаётларимда ҳам”, деб ёзган Родригес ва суратда Роналдуни белгилаган.

Маълумот учун, жуфтлик 2016 йилдан бери муносабатда ва 5 фарзандни тарбиялмоқда (кичик Криштиану, эгизаклар Ева ва Матео, ҳамда икки қиз: Алана Мартина ва Белла Эсмеральда).

Роналду жорий йилнинг июнида “Ал-Наср” билан шартномасини 2027 йилгача узайтирди. У Европа чемпиони (2016) ва Португалия терма жамоаси таркибида UEFA Миллатлар лигасининг икки карра ғолиби. Футболчилик фаолияти давомида ҳужумчи Португалиянинг “Спортинг”, Англиянинг “Манчестер Юнайтед”, Испаниянинг “Реал Мадрид” ва Италиянинг “Ювентус” клубларида тўп сурган.