Rim papasida ikki tomonlama pnevmoniya aniqlandi

Kecha, 18 fevral kuni kechqurun Rim papasi Fransiskda ikki tomonlama pnevmoniya boshlangani ma’lum qilindi. Bu haqda “Vatican News” xabar berdi.

Vatikan ma’lumotlariga ko‘ra, o‘tgan hafta kasalxonaga yotqizilgan Papaning laboratoriya tahlillari, ko‘krak rentgeni natijasi va uning hozirgi klinik holati murakkab vaziyatni ko‘rsatishda davom etishiga qaramasdan u “yaxshi kayfiyatda ekani” bildirildi.

88 yoshli Fransiskda bronxoektaziya va astmatik bronxit sharoitida yuzaga kelgan polimikrob infeksiya tashxisi antibiotiklardan foydalanishni talab qilgan, bu esa davolash jarayonini yanada murakkablashtirgani aytilmoqda.

Qayd etilishicha, Vatikan tibbiyot jamoasi va Agostino Jemelli nomidagi Poliklinika fondi tibbiyot xodimlari tomonidan buyurilgan ko‘krak kompyuter tomografiyasi tekshiruvi ikki tomonlama pnevmoniya boshlangani va bu esa qo‘shimcha farmakologik davolash talab qilinishini ko‘rsatdi. 

Ma’lumot uchun, Fransisk 2013 yilda papa etib saylanganidan beri bir necha kasallikdan aziyat chekib kelmoqda. U 2021 yil iyul oyida ham 10 kun shifoxonada yotib, yo‘g‘on ichak torayishidan davolangan. Keyinchalik Fransisk yo‘g‘on ichagining bir qismini olib tashlash uchun jarrohlik amaliyotidan o‘tgan. 

2024 yil yanvar oyida Fransisk “Associated Press”ga bergan intervyusida unga yo‘g‘on ichak jarrohligi o‘tkazishga sabab bo‘lgan ichak muammolari qayta yuzaga kelganini, biroq ular nazorat ostida ekanini aytgan. 

north_east

Saudiya podshohiga yana pnevmoniya tashxisi qo‘yildi

Yanvar oyida u o‘ng qo‘lida bint bog‘langan holda ko‘rinish bergan. Vatikan ma’lumotiga ko‘ra, papa o‘ng bilagidan “zarba olgan” va bint shunchaki “ehtiyot chorasi” sifatida ishlatilgan.

Fransisk 2022 yildan beri tizzalaridagi og‘riq sababli nogironlar aravachasidan foydalanib kelmoqda. U o‘zining sog‘lig‘iga oid muammolarni avtobiografiyasida kamtarona baholab, shunday yozgan: “Men yaxshiman. Haqiqat shuki, men shunchaki qariyapman”.

Eslatib o‘tamiz, o‘tgan hafta Rim papasi Fransisk uzoq vaqtdan beri davom etayotgan bronxitni davolash uchun shifoxonaga yotqizilgandi.

Sara Komiljonova