Рим папасида икки томонлама пневмония аниқланди

Кеча, 18 февраль куни кечқурун Рим папаси Францискда икки томонлама пневмония бошлангани маълум қилинди. Бу ҳақда “Vatican News” хабар берди.

Ватикан маълумотларига кўра, ўтган ҳафта касалхонага ётқизилган Папанинг лаборатория таҳлиллари, кўкрак рентгени натижаси ва унинг ҳозирги клиник ҳолати мураккаб вазиятни кўрсатишда давом этишига қарамасдан у “яхши кайфиятда экани” билдирилди.

88 ёшли Францискда бронхоэктазия ва астматик бронхит шароитида юзага келган полимикроб инфекция ташхиси антибиотиклардан фойдаланишни талаб қилган, бу эса даволаш жараёнини янада мураккаблаштиргани айтилмоқда.

Қайд этилишича, Ватикан тиббиёт жамоаси ва Агостино Жемелли номидаги Поликлиника фонди тиббиёт ходимлари томонидан буюрилган кўкрак компьютер томографияси текшируви икки томонлама пневмония бошлангани ва бу эса қўшимча фармакологик даволаш талаб қилинишини кўрсатди. 

Маълумот учун, Франциск 2013 йилда папа этиб сайланганидан бери бир неча касалликдан азият чекиб келмоқда. У 2021 йил июль ойида ҳам 10 кун шифохонада ётиб, йўғон ичак торайишидан даволанган. Кейинчалик Франциск йўғон ичагининг бир қисмини олиб ташлаш учун жарроҳлик амалиётидан ўтган. 

2024 йил январь ойида Франциск “Associated Press”га берган интервьюсида унга йўғон ичак жарроҳлиги ўтказишга сабаб бўлган ичак муаммолари қайта юзага келганини, бироқ улар назорат остида эканини айтган. 

north_east

Саудия подшоҳига яна пневмония ташхиси қўйилди

Январь ойида у ўнг қўлида бинт боғланган ҳолда кўриниш берган. Ватикан маълумотига кўра, папа ўнг билагидан “зарба олган” ва бинт шунчаки “эҳтиёт чораси” сифатида ишлатилган.

Франциск 2022 йилдан бери тиззаларидаги оғриқ сабабли ногиронлар аравачасидан фойдаланиб келмоқда. У ўзининг соғлиғига оид муаммоларни автобиографиясида камтарона баҳолаб, шундай ёзган: “Мен яхшиман. Ҳақиқат шуки, мен шунчаки қарияпман”.

Эслатиб ўтамиз, ўтган ҳафта Рим папаси Франциск узоқ вақтдан бери давом этаётган бронхитни даволаш учун шифохонага ётқизилганди.

Сара Комилжонова