Рим папаси шифохонага ётқизилди

Бугун, 14 февраль куни Рим папаси Франциск узоқ вақтдан бери давом этаётган бронхитни даволаш учун шифохонага олиб борилди. Бу ҳақда “Vatican News” хабар берди.

Маълум қилинишича, Франциск бир қатор диагностик текширувлардан ўтиши ва бронхитни даволашни давом эттириши керак. У сўнгги икки умумий тингловда ҳамда бошқа тадбирларда ўзининг олдиндан тайёрланган нутқларини ўқиб беришни бир неча марта бошқалардан сўраган.  

Маълумот учун, Франциск 2013 йилда папа этиб сайланганидан бери бир неча касалликдан азият чекиб келмоқда. У 2021 йил июль ойида ҳам 10 кун шифохонада ётиб, йўғон ичак торайишидан даволанган. Кейинчалик Франциск йўғон ичагининг бир қисмини олиб ташлаш учун жарроҳлик амалиётидан ўтган. 

2024 йил январь ойида Франциск  “Associated Press”га берган интервьюсида унга йўғон ичак жарроҳлиги ўтказишга сабаб бўлган ичак муаммолари қайта юзага келганини, бироқ улар назорат остида эканини айтган. 

Январь ойида у ўнг қўлида бинт боғланган ҳолда кўриниш берган. Ватикан маълумотига кўра, папа ўнг билагидан “зарба олган” ва бинт шунчаки “эҳтиёт чораси” сифатида ишлатилган.

Франциск 2022 йилдан бери тиззаларидаги оғриқ сабабли ногиронлар аравачасидан фойдаланиб келмоқда. У ўзининг соғлиғига оид муаммоларни автобиографиясида камтарона баҳолаб, шундай ёзган: “Мен яхшиман. Ҳақиқат шуки, мен шунчаки қарияпман.” 

Эслатиб ўтамиз, аввалроқ Рим-католик черкови раҳбари, папа Франциск “Ҳаёт: тарих давомида менинг ҳикоям” автобиографик китобида даволаниш учун шифохонада ётган пайтида, унинг ўлиши ёки истеъфога чиқишини кутганлар бўлганини ёзганди.