Рим папаси саратонга чалинди

Рим папаси Лео XIV да ўпка саратони аниқланди. Бу ҳақда “Reuters” хабар берди.

Маълум қилинишича, 71 ёшли понтификда ўпка аденокарциномаси – ўпка саратонининг кенг тарқалган турларидан бири аниқланган. Кеча, 13 октябрь куни шифокорлар унинг ўнг ўпкасининг пастки қисмини жарроҳлик йўли билан олиб ташлаган. Операция асоратларсиз якунланган. Операция вақтида олинган тўқималар таҳлили шифокорларнинг дастлабки текширувлар асосида билдирган тахминларини тасдиқлаган.

Папа Лео яқинда тиббий кўрикдан ўтганида унинг ўпкасида ўсма аниқланган. Шу сабабли у 13 октябрь куни Римдаги Гемелли шифохонасига ётқизилган. Жарроҳлик амалиёти тахминан 90 дақиқа давом этган.

Шифокорлар Стефано Маргаритора ва Луиджи Карбоненинг маълум қилишича, саратон билан зарарланган тўқималарни тўлиқ олиб ташлаш мақсадида ўнг ўпканинг пастки бўлаги олиб ташланган. Операциядан кейин Папа Лео ўзига келган ва шифохонадаги хонасига қайтиб, дам олишни бошлаган.

Бироқ ҳозирча касалликнинг қайси босқичдалиги маълум эмас. Буни аниқлаш учун ўсманинг ҳажми ва саратон лимфа тугунларига тарқалган-тарқалмаганини текшириш керак. Ватикан ҳозирча бу ҳақда маълумот бермаган.

Вашингтондаги Жоржтаун университети ўпка саратони бўйича мутахассиси Стивен Лунинг айтишича, агар ўсма кичик бўлса ва саратон лимфа тугунларига тарқалмаган бўлса, жарроҳлик амалиётининг ўзи беморни тўлиқ даволаши мумкин. Бироқ касаллик кенгроқ тарқалган бўлса, даволаниш прогнозининг ёмонроқ бўлиши мумкин.

Ватикан маълумотига кўра, Папа Лео шифохонада тахминан бир ҳафта қолиши кутилмоқда. Унинг жорий йилнинг 20 октябригача режалаштирилган барча оммавий тадбирлари бекор қилинган.

Маълумот учун, Папа Лео 2025 йил май ойида католик черкови кардиналлари томонидан папа этиб сайланган. Унинг асл исми Роберт Превост бўлиб, у 1955 йилда АҚШнинг Чикаго шаҳрида туғилган. У бир неча ўн йил давомида Перуда миссионер ва епископ бўлиб хизмат қилган.

Эслатиб ўтамиз, аввалроқ Рим папаси Лео XIV ўпкасида аниқланган тугунни олиб ташлаш учун операция қилиниши ҳақида хабар берилган эди.