Путин Украинада тинчлик ўрнатишга интилмоқда – Трампнинг одами

north_east

Трампнинг одами россияпараст таклифларни илгари сурмоқда

АҚШ Президенти Дональд Трампнинг махсус вакили Стив Уиткофф Россия Президенти Владимир Путин Украинада тинчлик ўрнатишга интилаётгани, Россия ва АҚШ ўртасидаги келишув Украинанинг беш вилояти тақдирига дахлдор эканини айтди. Бу ҳақда у кеча, 14 апрель куни “Fox News” телеканалига берган интервьюсида сўз очди.

Уиткоффдан 11 апрель куни Санкт-Петербургда Путин билан музокаралари қандай ўтгани сўралган.

“Бу аллақачон у билан учинчи учрашув. Бу охирги учрашув беш соатча давом этди. Хонада унинг иккита асосий маслаҳатчиси бор эди: Юрий Ушаков ва Кирилл Дмитриев. Бу қизиқарли учрашув бўлди ва якунда биз ўз позицияларимизни яқинлаштирдик”, деди Уиткофф.

Унинг айтишича, Путин сўраётган нарса – доимий тинчлик бўлиши.

“Ушбу тинчлик шартномаси бешта ҳудуд деб аталадиган ҳудудга тегишли, аммо яна кўп нарсалар мавжуд. Хавфсизлик протоколлари мавжуд. НАТО, бешинчи модда бор. Бунга жуда кўп тафсилотлар киради. Бу икки давлат ўртасидаги ҳақиқий муаммоларга асосланган мураккаб вазият”, дея давом этди АҚШ махсус вакили.

“Биз бутун дунё учун жуда ва жуда муҳим бўлган нарса ёқасида бўлишимиз мумкин. Бундан ташқари, менимча, минтақада ҳақиқий барқарорликни таъминлайдиган жуда жозибали тижорат имкониятлари орқали Россия ва АҚШ ўртасидаги муносабатларни ўзгартириш имконияти мавжуд. Ҳамкорлик барқарорликни яратади”, дея хулоса қилди у.

Владимир Путин ва Стив Уиткофф ўртасидаги учрашув 11 апрель куни Санкт-Петербургда Президент кутубхонаси биносида бўлиб ўтди. Музокаралардан сўнг Кремль воизи Дмитрий Песков учрашув тафсилотлари сир сақланишини айтди. Шу билан бирга, у Россия Президенти ва АҚШ Президентининг махсус вакили Россия-Украина можаросини тартибга солишни муҳокама қилганини билдирди. Оқ уй эса Уиткоффнинг Россияга ташрифини Украинада тинчликка эришиш йўлидаги қадам деб атади.