Путин Трампга сигнал юборди – Ушаков

Россия Президенти Владимир Путин АҚШ Президенти Дональд Трампнинг махсус вакили Стивен Уиткофф билан учрашуви чоғида Оқ уй раҳбарига Украинадаги можарони ҳал этиш бўйича бир нечта сигналлар юборди. Бу ҳақда бугун, 6 август куни Кремлдаги учрашувдан сўнг Россия Президентининг ёрдамчиси Юрий Ушаков маълум қилди.

Ушаковнинг сўзларига кўра, томонлар ўртасидаги учрашув фойдали ва конструктив руҳда ўтган. 

“Биз томондан, хусусан, Украина масаласида айрим сигналлар етказилди. Шунингдек, Президент Трамп томонидан ҳам мос сигналлар олинди”, деган Президент ёрдамчиси. 

Бугун, 6 август куни Россия раҳбари Уиткоффни Кремлда қабул қилди. Учрашув тахминан уч соат давом этди. Кремль матбуот хизмати музокаралар якунлангани ҳақида хабар берди, бироқ учрашув тафсилотларини очиқламади.

Қайд этиш жоиз, Уиткоффнинг Москвага ташрифи АҚШ Президенти Дональд Трамп томонидан берилган ультиматум муддати тугашидан олдин амалга ошмоқда. Трамп Россия ва унинг иттифоқчиларига нисбатан 100 фоизлик божлар жорий этишини айтган. 

Трамп бугун, 6 август куни кечқурун Оқ уйдан чиқиш қилиб, санкциялар бўйича ўз позициясини эълон қилиши ҳам кутилмоқда.